जर्जियाबाट सिनेटमा डेमोक्रेटिक उम्मेदबार वार्नक विजयी,जर्जियाबाट सिनेटमा जित्ने पहिलो अश्वेत
प्रकाशित मिति : पुस २२, २०७७ बुधबार
जर्जियाबाट सिनेटमा डेमोक्रेटिक उम्मेदबार राफल वार्नक विजयी भएका छन् । अब उनी जर्जियाबाट सिनेटमा प्रतिनिधित्व गर्ने पहिलो अश्वेत अमेरिकन भएका छन् ।
९८ प्रतिशत मतगणना हुँदा वार्नकले २२ लाख २७ हजार २ सय ९६ मत ल्याएका छन् । रिपब्लिकन उम्मेदबार केली लोफ्लरले २१ लख ७३ हजार ८ सय ६६ मत ल्याएकी छिन् ।
जर्जियाबाट सन् २००४ यता सिनेटमा दुबै सदस्य रिपब्लिकनहरु रहदै आएका थिए । जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएकोमा यसपटक डेमोक्रेटिक उम्मेदबार जो बाइडेनले जीतेका थिए ।
अर्को सिटमा पनि डेमोक्रेटिक उम्मेदबार जोन ओसोफले अग्रता कायम गरेका छन् । अहिलेसम्मको परिणाम अनुशार ओसोफले २२ लाख ८ हजार ७ सय १७ मत ल्याएका छन् भने रिपब्लिकन उम्मेबार डेभिड पर्डयुले २१ लाख ९२ हजार ३ सय ७४ मत ल्याएका छन् ।
ओसोफलले पनि जीतेमा दुबै सिटमा डेमोक्रेटिक उम्मेदबार विजयी हुनेछन् । साथै सिनेटमा पनि डेमोक्र्याट्सको बहुमत कायम हुनेछ ।
वार्नकको जितसँगै सिनेटमा ४९ सिट डेमोक्रेटिक पार्टीले र ५० सिट रिपब्लिकन पार्टीले जीतेका छन् । प्रतिनिधिसभामा डेमोक्र्याट्सको नियन्त्रणका कायम छ ।
ओसोफले पनि जितेमा उपराष्ट्रपटिको टाइब्रेक मतका आधारमा सिनेटमा डेमोक्र्याट्सको बहुमत हुनेछ । बाइडेन प्रशासनले संसदबाट आफूले चाहेका बिलहरु आगामी दुईबर्षसम्म पारित गराउन सक्नेछन् भने विभिन्न नियुक्तीहरु समेत सहजै गर्न सक्नेछन् । तर एउटामात्र सिट रिपब्लिकनले जितेमा पनि सिनेटमा रिपब्लिकनकै बहुमत कायम हुनेछ ।
सिनेटमा बहुमत कायम भएमा बाइडेन प्रशासनले आफूले चाहेका बिलहरु संसदबाट सहजै पारित गराउन सक्नेछ भने नियुक्ती लगायतका विषयमा पनि कुनै अवरोध हुनेछैन । ११ मिलियन कागजपत्रविहिन आप्रवासीहरुलाई ग्रिनकार्डहुँदै नागरिकताको बाटोमा लैजाने डेमोक्र्याट्सको एजेण्डा कार्यान्वयन गर्न पनि बाटो खुल्नेछ ।