जर्जिया चुनावः हुलाकबाट पठाइएका सबै १० लाख मत गणना गर्न समय लाग्ने
प्रकाशित मिति : पुस २१, २०७७ मंगलबार
सिनेटका २ सिटको लागि आज सम्पन्न जर्जियाको चुनावमा प्रत्यक्ष उपस्थीत भएर गरिएका अग्रिम मत र आज मुख्य दिन गरिएका मतको गणना भइरहेको छ । राती १० बजेर २२ मिनेटसम्म साढे ३७ लाखभन्दा बढी मत गणना भइसकेको छ भने यो समाचार तयार पार्दासम्म दुबै सिटमा रिपब्लिकन उम्मेदबारले झिनो अग्रता कायम गरिरहेका छन् ।
जर्जियाको चुनावमा १० लाख १८ हजार ३ सय ८१ ज्नाले हुलाकबाट मतपत्र पठाएर मतदान गरेका छन् । हुलाकबाट पठाइएका सबै मत गणना गर्न र सबै परिणाम आउन समय लाग्ने छ ।
आजको चुनावमा रिपब्लिकन उम्मेदवारहरु डेभिड पर्डयु र केली लोफ्लर मैदानमा रहेका रहेका छन् । त्यस्तै डेमोक्रेटिक उम्मेदवारहरुमा जोन ओसफ र राफल वार्नक रहेका छन् ।
सिनेटको बहुमत निर्धारण गरेर सिंगै अमेरिकाको परिदृश्य परिवर्तन गर्नसक्ने आजको जर्जियाको चुनावमा अमेरिकाको मात्र होइन, अमेरिकन राजनीतिप्रति चासो राख्ने विश्वकै ध्यानाकर्षण भएको छ । आजको चुनावले अमेरिकाको सिनेटमा कुन राजनीतिक दलको नियन्त्रण कायम हुनेछ भन्ने कुराको निर्धारण गर्नेछ ।
सिनेटमा अहिले ४८ सिट डेमोक्रेटिक पार्टीले र ५० सिट रिपब्लिकन पार्टीले जीतेका छन् । प्रतिनिधिसभामा डेमोक्र्याट्सको नियन्त्रणका कायम भइसकेको छ ।
जर्जियामा दुबै सिट रिपब्लिकनले जितेमा सिनेटमा रिपब्लिकनको बहुमत कायम हुनेछ । यसो भएमा बाइडेन प्रशासनले संसदबाट आफूले चाहेका बिलहरु आगामी दुईबर्षसम्म पारित गराउनमामात्र होइन, विभिन्न नियुक्तीहरुमा समेत रिपब्लिकनको सहमति लिन जरुरी हुनेछ । एउटामात्र सिट रिपब्लिकनले जितेमा पनि सिनेटमा रिपब्लिकनकै बहुमत कायम हुनेछ ।
सिनेटमा बहुमत कायम गर्नका लागि डेमोक्र्याट्सलाई आजको चुनाबबाट दुबै सिट जित्न आवश्यक हुन्छ । यसो भएमा बाइडेन प्रशासनले आफूले चाहेका बिलहरु संसदबाट सहजै पारित गराउन सक्नेछ भने नियुक्ती लगायतका विषयमा पनि कुनै अवरोध हुनेछैन । ११ मिलियन कागजपत्रविहिन आप्रवासीहरुलाई ग्रिनकार्डहुँदै नागरिकताको बाटोमा लैजाने डेमोक्र्याट्सको एजेण्डा कार्यान्वयन गर्न पनि बाटो खुल्नेछ ।
१६ इलेक्टोरल मत रहेको जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएकोमा यसपटक डेमोक्रेटिक उम्मेदबार बाइडेनले जीतेका थिए । कुनैबेलाको रेडस्टेट जर्जिया अब ब्याटलग्राउण्ड राज्य भएको छ ।
सन् २००२ यता जर्जियामा रिपब्लिकन गभर्नरले जित्दै आएका छन् । त्यस्तै जर्जियाबाट सन् २००४ यता सिनेटमा दुबै सदस्य रिपब्लिकनहरु रहदै आएका छन् । तर हाउसमा भने मिश्रित प्रतिनिधित्व रहँदै आएको छ ।