जर्जिया: झण्डै १ लाख ३५ हजार मत गणना गर्न बाँकी, चुनाव ‘नेक एण्ड नेक’
प्रकाशित मिति : पुस २२, २०७७ बुधबार
(यो समाचार पछिल्लो विवरणसहित अपडेट गरिएको छ। – सम्पादक)
सिनेटका २ सिटका लागि भएको जर्जियाको चुनावको मतपरिणाम आउने क्रम जारी छ ।
यो समाचार तयार पार्दासम्म ३ वटा काउन्टीबाहेक अन्य सबै काउन्टीको अधिकांश चुनावी परिणाम आइसकेको छ । ३ वटा काउन्टीहरुमा ह्यानकक काउन्टीको ८० प्रतिशत, डिकाल्बको ८७ प्रतिशत, फुल्टनको ९६ प्रतिशत चुनावी परिणाम आइसकेको छ । ग्वीनेट काउन्टीले बाँकी रहेका झण्डै ५ हजार मत भोलि विहान गणना गर्ने भएको छ ।
राती १२:३५ बज्दासम्म उम्मेदबारहरुबीचको मतान्तर निकै झिनो रहेको छ ।९७ प्रतिशत मतगणना हुँदा एउटा सिटमा रिपब्लिकनले र अर्कोमा डेमोक्र्याट्सले अग्रता कायम गरेका छन् । झण्डै ४४ लाख मतगणना भइसकेको छ । अब झण्डै १ लाख ३५ हजार मत गणना गर्न बाँकी रहेको छ ।
रिपब्लिकन उम्मेदवार डेभिड पर्डयुले डेमोक्रेटिक उम्मेदवार जोन ओसफका बिरुद्ध झिनो अन्तरले अग्रता कायम गरेका छन् । त्यस्तै डेमोक्रेटिक उम्मेदवार राफल वार्नकले रिपब्लिकन उम्मेदबार केली लोफ्लर बिरुद्ध झिनो अन्तरले अग्रता कायम गरेका छन् ।
सिनेटको बहुमत निर्धारण गरेर सिंगै अमेरिकाको परिदृश्य परिवर्तन गर्नसक्ने आजको जर्जियाको चुनावमा अमेरिकाको मात्र होइन, अमेरिकन राजनीतिप्रति चासो राख्ने विश्वकै ध्यानाकर्षण भएको छ । आजको चुनावले अमेरिकाको सिनेटमा कुन राजनीतिक दलको नियन्त्रण कायम हुनेछ भन्ने कुराको निर्धारण गर्नेछ ।
सिनेटमा अहिले ४८ सिट डेमोक्रेटिक पार्टीले र ५० सिट रिपब्लिकन पार्टीले जीतेका छन् । प्रतिनिधिसभामा डेमोक्र्याट्सको नियन्त्रणका कायम भइसकेको छ ।
जर्जियामा दुबै सिट रिपब्लिकनले जितेमा सिनेटमा रिपब्लिकनको बहुमत कायम हुनेछ । यसो भएमा बाइडेन प्रशासनले संसदबाट आफूले चाहेका बिलहरु आगामी दुईबर्षसम्म पारित गराउनमामात्र होइन, विभिन्न नियुक्तीहरुमा समेत रिपब्लिकनको सहमति लिन जरुरी हुनेछ । एउटामात्र सिट रिपब्लिकनले जितेमा पनि सिनेटमा रिपब्लिकनकै बहुमत कायम हुनेछ ।
सिनेटमा बहुमत कायम गर्नका लागि डेमोक्र्याट्सलाई आजको चुनाबबाट दुबै सिट जित्न आवश्यक हुन्छ । यसो भएमा बाइडेन प्रशासनले आफूले चाहेका बिलहरु संसदबाट सहजै पारित गराउन सक्नेछ भने नियुक्ती लगायतका विषयमा पनि कुनै अवरोध हुनेछैन । ११ मिलियन कागजपत्रविहिन आप्रवासीहरुलाई ग्रिनकार्डहुँदै नागरिकताको बाटोमा लैजाने डेमोक्र्याट्सको एजेण्डा कार्यान्वयन गर्न पनि बाटो खुल्नेछ ।
१६ इलेक्टोरल मत रहेको जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएकोमा यसपटक डेमोक्रेटिक उम्मेदबार बाइडेनले जीतेका थिए । कुनैबेलाको रेडस्टेट जर्जिया अब ब्याटलग्राउण्ड राज्य भएको छ ।
सन् २००२ यता जर्जियामा रिपब्लिकन गभर्नरले जित्दै आएका छन् । त्यस्तै जर्जियाबाट सन् २००४ यता सिनेटमा दुबै सदस्य रिपब्लिकनहरु रहदै आएका छन् । तर हाउसमा भने मिश्रित प्रतिनिधित्व रहँदै आएको छ ।