जर्जियाबाट सिनेटका दुबै सिट डेमोक्र्याट्सले जित्ने अधिकांश सर्वेक्षण
प्रकाशित मिति : पुस २१, २०७७ मंगलबार
आज जर्जियामा सिनेटका २ सिटका लागि मतदान भइरहेको छ । एउटा सिटमा रिपब्लिकन उम्मेदबार डेभिड पर्डयु र डेमोक्रेटिक उम्मेदबार जोन ओसोफबीच प्रतिस्पर्धा भइरहेको छ भने अर्को सिटमा डेमोक्रेटिक उम्मेदबार राफल वार्नक र रिपब्लिकन उम्मेदबार केली लोफ्लरबीच प्रतिस्पर्धा भइरहेको छ ।
चुनाव अगाडि भएका अधिकांश सर्वेक्षणहरुले डेमोक्रेटिक उम्मेदबारहरुले जित्ने देखाएका छन् । तर वास्तविक परिणामका लागि भने आजको चुनावको नतिजाको प्रतिक्षा गर्नैपर्छ । दुबै सिट डेमोक्र्याट्सले जितेमा सिनेटमा डेमोक्र्याट्सको बहुमत कायम हुनेछ भने एउटामात्र सिट रिपब्लिकनले जितेमा पनि सिनेटमा रिपब्लिकनको बहुमत कायम हुनेछ ।
एउटा सिटका लागि विभिन्न २७ वटा सर्वेक्षणहरुमध्ये १३ वटा सर्वेक्षणले डेमोक्रेटिक उम्मेदबार जोन ओसोफले जित्ने देखाएका छन् भने १० वटा सर्वेक्षणले रिपब्लिकन उम्मेदबार डेभिड पर्डयुले जित्ने देखाएका छन् । त्यस्तै ४ वटा सर्वेक्षणमा बराबरी देखिएको छ ।
त्यस्तै अर्को सिटका लागि विभिन्न २८ वटा सर्वेक्षणहरुमध्ये १७ वटा सर्वेक्षणले डेमोक्रेटिक उम्मेदबार राफल वार्नकले जित्ने देखएका छन् भने ११ वटा सर्वेक्षणले रिपब्लिकन उम्मेदबार केली लोफ्लरले जित्ने देखाएका छन् ।
सिनेटको बहुमत निर्धारण गरेर सिंगै अमेरिकाको परिदृश्य परिवर्तन गर्नसक्ने आजको जर्जियाको चुनावमा अमेरिकाको मात्र होइन, अमेरिकन राजनीतिप्रति चासो राख्ने विश्वकै ध्यानाकर्षण भएको छ । आजको चुनावले अमेरिकाको सिनेटमा कुन राजनीतिक दलको नियन्त्रण कायम हुनेछ भन्ने कुराको निर्धारण गर्नेछ ।
डेमोक्र्याट्सले आजको चुनाबबाट दुबै सिट जितेमा बाइडेन प्रशासनले आफूले चाहेका बिलहरु संसदबाट सहजै पारित गराउन सक्नेछ भने नियुक्ती लगायतका विषयमा पनि कुनै अवरोध हुनेछैन । ११ मिलियन कागजपत्रविहिन आप्रवासीहरुलाई ग्रिनकार्डहुँदै नागरिकताको बाटोमा लैजाने डेमोक्र्याट्सको एजेण्डा कार्यान्वयन गर्न पनि बाटो खुल्नेछ ।
आज बेलुका ७ बजे मतदान समाप्त भएपछि मतगणना सुरु गरिने छ । राष्ट्रपति चुनावको नतिजा झण्डै १२ हजारमतले निर्धारण भएको जर्जियामा नोभेम्बर ३ को चुनावमा मतदान नै नगरेका दशौं हजारले अग्रिम मतदानमा मतदान गरेका छन् ।
१६ इलेक्टोरल मत रहेको जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएकोमा यसपटक डेमोक्रेटिक उम्मेदबार बाइडेनले जीतेका थिए । कुनैबेलाको रेडस्टेट जर्जिया अब ब्याटलग्राउण्ड राज्य भएको छ ।
सन् २००२ यता जर्जियामा रिपब्लिकन गभर्नरले जित्दै आएका छन् । त्यस्तै जर्जियाबाट सन् २००४ यता सिनेटमा दुबै सदस्य रिपब्लिकनहरु रहदै आएका छन् । तर हाउसमा भने मिश्रित प्रतिनिधित्व रहँदै आएको छ ।