जर्जिया चुनाव: नोभेम्बर ३ को चुनावी परिणाममा कुन उम्मेदवार अगाडि थिए ?
प्रकाशित मिति : पुस २१, २०७७ मंगलबार
अमेरिकी सिनेटमा कुन राजनीतिक दलको नियन्त्रण कायम हुने भन्ने सन्दर्भमा आज जर्जियामा सिनेटका २ सिटमा निर्वाचन भइरहेको छ । आजको चुनावमा रिपब्लिकन उम्मेदवारहरु डेभिड पर्डयु र केली लोफ्लर मैदानमा रहेका रहेका छन् । त्यस्तै डेमोक्रेटिक उम्मेदवारहरुमा जोन ओसफ र राफल वार्नक रहेका छन् ।
जर्जियाको चुनावमा निर्वाचित हुनका लागि ५० प्रतिशतभन्दा बढी मत ल्याउन आवश्यक हुने भएकाले र नोभेम्बरको चुनावमा कुनै पनि उम्मेदबारले ५० प्रतिशतभन्दा बढी मत नल्याएका कारण सबैभन्दा बढी मत ल्याएका दुई उम्मेदबारहरुबीच आज प्रतिस्पर्धा भइरहेको छ । जर्जियामा रहेका अमेरिकनहरु निकै उत्साहका साथ मतदानमा सहभागी भइरहेका छन् ।
गत नोभेम्बरमा भएको चुनावमा रिपब्लिकन उम्मेदबार डेभिड पर्डयु र डेमोक्रेटिक उम्मेदबार जोन ओसोफबीच भएको चुनावमा पर्डयुले ४९ दशमलव ७ प्रतिशत अर्थात् २४ लाख ६२ हजार ६ सय १७ मत ल्याएका थिए । त्यस्तै डेमोक्रेटिक उम्मेदबार जोन ओसोफले ४७ दशमलव ९ प्रतिशत अर्थात् २३ लाख ७४ हजार ५ सय १९ मत ल्याएका थिए । झण्डै ८८ हजारमतको अन्तर रहेको थियो । त्यतीबेला लिबरटेरियन उम्मेदबार शेन ह्याजलले १ लाख १५ हजार ३९ मत ल्याएका थिए ।
त्यस्तै नोभेम्बरमा सिनेटको अर्को सिटका लागि भएको चुनावमा डेमोक्रेटिक उम्मेदबार राफल वार्नकले ३२ दशमलव ९ प्रतिशत मत ल्याएर अग्रता कायम गरेका थिए । रिपब्लिकन उम्मेदबार केली लोफ्लरले २५ दशमलव ९ प्रतिशत मत ल्याएकी थिइन् । लोफ्लरको तुलनामा वार्नकले झण्डै साढे ३ लाख बढी मत ल्याएका थिए ।
तर अर्का रिपब्लिकन उम्मेदबार डग कोलिन्सले झण्डै १० लाख मत ल्याएका थिए भने डेमोक्रेटिक उम्मेदबार डेब्राह ज्याक्सनले ३ लाख बढी मत ल्याएका थिए । चुनावमा झण्डै पचास लाखले मतदान गरेका थिए ।
आजको चुनावका सन्दर्भमा झण्डै ३१ लाखले अग्रिम मतदान गरिसकेका छन् । जुन कुल मतदाताहरुको संख्याको ४० प्रतिशत हो । अग्रिम मतदान गर्नेहरुमध्ये झण्डै २० लाख ७४ हजारले मतदान स्थलमा उपस्थीत भएर र १० लाख १८ हजार बढीले हुलाकमार्फत मतदान गरेका थिए । आज चुनावको मुख्य दिन २० लाख भन्दा बढीले मतदान गर्ने अपेक्षा गरिएको छ ।
