टेक्सासको चर्चमा गोली चल्दा पादरीको मृत्यु, अन्य दुई घाइते
प्रकाशित मिति : पुस १९, २०७७ आईतबार
टेक्सासको चर्चमा गोली चल्दा एकजना पादरीको मृत्यु भएको छ भने अन्य दुईजना घाइते भएका छन् । आइतबार विहान टेक्सासको स्टारभिलमा रहेको स्टारभिल मेथोडिस्ट चर्चमा गोली चलेको हो ।
डलासबाट झण्डै १ सय माइल पूर्वमा रहेको उक्त चर्चमा गोली चलाउने संदिग्धलाई हिराशतमा लिइएको छ । उक्त व्यक्ति आइतबार शनिबार राती भएको एउटा घटनापछि प्रहरीबाट भागेर चर्चमा लुक्नका लागि छिरेको बताइएको छ ।
पादरीले उक्त व्यक्ति विहान ९ बजेर २१ मिनेट जाँदा बाथरुममा लुकेको फेला पारेका थिए । पादरी, उनकी पत्नी र अरु केही व्यक्ति त्यतीबेला चर्चमा प्रवेश गरेका थिए । लुकेको व्यक्ति तत्काल त्यहाँबाट भागेको थियो तर केहीबेरमा चर्चमा फर्केर गोली चलाएको थियो ।
Texas will seek swift justice for the shooter.
We thank law enforcement for their response.
Keep the harmed in your prayers. https://t.co/Asyb74lt9L
— Greg Abbott (@GregAbbott_TX) January 3, 2021
उक्त व्यक्तिले अगाडिको ढोकाबाट चर्चमा छिरेर पादरीलाई नियन्त्रणमा लिको थियो । त्यसपछि पादरीको हतियार खोसेर पादरीलाई नै हानेको थियो । घटनामा घाइते भएका अन्यको अवस्थाबारे केही बताइएको छैन ।
गोली चलाएपछि उक्त व्यक्ति पादरीकै गाडी चोरेर भागेको थियो । त्यसपछि प्रहरीले उसलाई ह्यारिसन काउन्टीमा पक्राउ गरेको थियो । उक्त व्यक्तिको हातमा बन्दुकको चोट लागेको जनाइएको छ । तर कतिबेला उसलाई गोली लागेको भन्नेबारे स्पष्ट छैन ।
घटनामा ज्यान गुमाउने पादरी, घाइतेहरु र आक्रमणकारीको परिचय खुलाइएको छैन । टेक्सासका गभर्नरले मृतकका परिवारप्रति समवेदना व्यक्त गरेका छन् ।