ट्रम्पले ‘भिटो’ प्रयोग गरी अस्वीकार गरेको सुरक्षा बिल हाउसबाट ‘ओभरराइड’
प्रकाशित मिति : पुस १३, २०७७ सोमबार
संसदबाट भारी बहुमतले पारित भएपछि पनि अमेरिकी राष्ट्रपति डोनाल्ड ट्रम्पले भिटो प्रयोग गरेर संसदमा फिर्ता पठाएको राष्ट्रिय सुरक्षा प्राधिकरण
बिल ट्रम्पको भिटोलाई अस्वीकार गर्नेगरी प्रतिनिधिसभाबाट पारित भएको छ । अब सिनेटमा दुई तिहाई बहुमतले पारित भएमा यो बिल ट्रम्पको भिटोका बाबजुत पनि कार्यान्वयनमा आउनेछ ।
हाउसबाट यो बिल कमा समेत परिवर्तन नगरी पहिलेकै स्वरुपमा जस्ताको तस्तै पारित गरिएको छ । दुबै दलको भारी समर्थन रहेको यो बिल अब राष्ट्रपति ट्रम्पको समर्थन बिना नै कानुन बन्ने देखिएको छ । अमेरिकामा राष्ट्रपतिले भिटो प्रयोग गरेर अस्वीकार गरेको बिल संसदका दुबै सदनबाट दुई तिहाई बहुमतले पारित भएमा राष्ट्रपतिको सहमति विना पनि कानुन बन्नसक्छ ।
ट्रम्पको कार्यकालमा नै पहिलोपटक भिटो ओभरराइड गर्ने निश्चित रहेको यो बिल सेनाको तलब बढाउने, हतियारको खरिदमा निर्देशन दिने र सैन्य नीति बनाउने ७४१ बिलियन डलरको सुरक्षा प्याकेज हो । तर ट्रम्पले आफूले चाहेका कुराहरु समावेश नभएको भन्दै बिल फिर्ता गरेका थिए ।
आफ्नो प्रशासनले यो ऐनको राष्ट्रिय सुरक्षामा महत्व बुझेको तर दुर्भाग्यवश बिलले महत्वपूर्ण सुरक्षा मापदण्डहरु समावेश गर्न छुटाएको, राष्ट्रिय सुरक्षामा अमेरिका पहिलो राख्ने ट्रम्प प्रशासनको नीतिको विरोधाभाष रहेको भन्दै ट्रम्पले बिलमा भिटो प्रयोग गरेका थिए । ट्रम्पले यो बिल चीन र रसियाका लागि उपहारजस्तो भएको आरोप लगाएका थिए ।
ट्रम्पले यसअगाडि पनि यो बिलमा भिटो प्रयोग गर्ने आशयबारे बताउदै आएका थिए । यो बिल झण्डै २ साता अगाडि पारित भएको थियो । यो बिलको ७ जना रिपब्लिकन सिनेटर, ५ जना डेमोक्र्याट्स सिनेटरहरु र सिनेटर बर्नी स्याण्डर्सले समेत विरोध गरेका थिए ।
यो बिलले ६३५ दशमलव ५ बिलियन डलर पेन्टागनका लागि प्रदान गर्छ भने २६ दशमलव ६ बिलियन डलर आणविक कार्यक्रमका लागि उर्जा मन्त्रालयलाई प्रदान गर्दछ । अरु ६९ बिलियन अफगानिस्तान र मध्यपूर्वमा अमेरिकन सैन्य अपरेशनका लागि प्रदान गर्दछ ।
यो बिलले सेनाको तलब ३ प्रतिशतले बढाउँछ भने पारिवारिक विदामा रहँदासम्म उनीहरुलाई तलबको व्यवस्था गर्दछ । यो बिलले प्यासेफिक क्षेत्रमा चीनलाई रोक्नेमा केन्द्रीत कार्यक्रम प्यासेफिक डिटेरेन्स इनिसियटिभका लागि २ दशमलव २ बिलियन डलर छुट्याएको छ ।
