बेलायतबाट अमेरिका आउन ‘कोरोना नेगेटिभ रिपोर्ट’ अनिवार्य
प्रकाशित मिति : पुस ९, २०७७ बिहीबार
अमेरिकन सीडीसीले बिहिबार राती वक्तब्य जारी गर्दै बेलायतबाट अमेरिका आउन कोरोना नेगेटिभ रिपोर्ट अनिवार्य बनाएको छ । बेलायतबाट आउने अमेरिकी नागरिकका साथमा सबैका लागि कोरोना रिपोर्ट नेगेटिभ हुनुपर्नेछ ।
बेलायतमा कोरोनाको नयाँ प्रकार देखिएपछि यसबारे चिन्ता बढेको हो । अमेरिकाका बरिष्ठ सरुवा रोग विशेषज्ञ डाक्टर एन्थोनी फाउचीले बेलायतबाट अमेरिका आउने उडानमा प्रतिबन्ध लगाउन आवश्यक नभएको तर नेगेटिभ कोरोना रिपोर्ट अनिवार्य बनाउने प्रावधान राख्न उचित हुने बताएका थिए ।
बेलायतबाट अमेरिका आउने यात्रुहरुले विमान चढ्नुभन्दा तीनदिनभित्र कोरोना परीक्षण गरेको हुनुपर्ने र रिपोर्ट नेगेटिभ हुनुपर्ने सीडीसीले जनाएको छ । विगत १४ दिनभित्र बेलायतमा रहेका सबैका लागि यो नियम लागु हुनेछ ।
पीसीआर र एन्टीजेन परीक्षणमध्ये कुनैपनि परीक्षण स्वीकार गरिने भएको छ । यो नियम डिसेम्बर २८ बाट लागु हुने जनाइएको छ ।
यसैबीच कोरोनाबिरुद्धको खोप निर्माण गरेर अमेरिकी सरकारबाट स्वीकृति पाएलगत्तै वितरण सुरु गरेका फाइजर र मोडेर्नाले कोरोना भाइरसको नयाँ प्रकारबिरुद्ध भ्याक्सिनले काम गर्ने नगर्ने थाहा पाउन परीक्षण सुरु गरिरहेका छन् । कम्पनीले वक्तब्य जारी गर्दै बेलायतमा भेटिएको कोरोनाको नयाँ प्रकारबिरुद्ध परीक्षण गरिरहेको बताएका हुन् ।
बेलायतमा देखिएको कोरोनाको नयाँ प्रकारबिरुद्ध भ्याक्सिनले काम गर्ने अहिलेसम्मको तथ्यांक हेर्दा आफूहरु आशावादी रहेको मोडेर्नाले जनाएको छ । तर आशालाई पुष्टी गर्ने आगामी साताहरुमा थप परीक्षणहरु गर्ने मोडेर्नाले जनाएको छ ।
बेलायतमा देखिएको कोरोनाको नयाँ प्रकारलाई निर्मलीकरण गर्न भ्याक्सिन कत्तिको सफल हुन्छ भन्ने जाँच्न भ्याक्सिन लगाएका व्यक्तिबाट रगतका नमुनाहरु संकलन गरेर तथ्यांक निर्माण गरिरहेको फाइजरले जनाएको छ । कोरोना भाइरसपहिले पनि म्युटेशन भएर नयाँ नयाँ प्रकारमा देखिएको थियो । ती प्रकारहरुबिरुद्ध भ्याक्सिनले काम गरेको पाइएको मोडेर्ना र फाइजरले जनाएका थिए ।
बेलायतमा देखिएको कोरोनाको नयाँ प्रकारबारे विश्वब्यापी चासो बढिरहँदा भ्याक्सिन कम्पनीले यस्तो वक्तब्य जारी गरेका हुन् । क्यानडा लगायतका कैयन मुलुकले बेलायतबाट आउने यात्रुहरुमा नयाँ प्रतिबन्धहरु लगाएका छन् ।
अमेरिकाका बरिष्ठ सरुवा रोग विशेषज्ञ डाक्टर एन्थोनी फाउचीले कोरोनाको नयाँ प्रकार अमेरिकामा पनि हुनसक्ने बताएका छन् । भाइरसको म्युटेशन असाधारण कुरा नभएको र प्रायजसो नयाँ म्युटेशनबाट कुनै उल्लेख प्रभाव नपर्ने गरेको फाउचीको भनाई छ ।