२ बर्षको अवधिमा चौथो चुनाव गराउनुपर्ने अवस्था श्रृजना गर्दै इजरायलको सरकार पतन
प्रकाशित मिति : पुस ७, २०७७ मंगलबार
२ बर्षको अवधिमा चौथो चुनाव गराउनुपर्ने अवस्था श्रृजना गर्दै इजरायलको सरकार पतन भएको छ । संसदले २०२० र २०२१ को बजेट डेडलाइनभित्र पारित गर्न नसकेपछि मंगलबार मध्यराती सरकार पतन भएको हो ।
अब सम्भवत आगामी मार्च २३ मा चुनाव हुने दिशातिर इजरायल अगाडि बढेको छ । आगामी मार्चमा चुनाव भएमा यो २ बर्षको अवधिमा चौथो चुनाव हुनेछ ।
प्रधानमन्त्री बेन्जामिन नेतेनेहु र उनका पूर्व गठबन्धनमा रहेका ब्लु एण्ड ह्वाइट नेता बेनी गान्जले उनीहरुको ७ महिना लामो सरकार पतनका लागि एकअर्कालाई आरोप लगाएका छन् । ब्यु एण्ड ह्वाइट गठबन्धनको सहमतिबाट पछि हटेपछि कोरोना महामारीमा अनावश्यक चुनावमा जाने अवस्था आएको नेतेनेहुले जनाएका छन् ।
आफूहरुले जित्ने निश्चित भएको र चुनावमा जान नडराउने उनले बताएका छन् । गान्जले प्रधानमन्त्री जनताको हितमा नभई आफूबिरुद्धको भ्रष्टाचारको अभियोगका सन्दर्भमा व्यस्त रहेको बताएका छन् । आर्थिक स्थीरता र अर्थ व्यवस्थाको पुन स्थापना सुनिश्चित गर्नुको साटो देशलाई अनिश्चिततातिर लैजानमा व्यस्त रहेको उनले नेतेनेहुमाथि आरोप लगाएका छन् ।
तीनवटा अपूर्ण चुनावपछि र कोरोनाको महामारी फैलिएपछि गान्ज गत अप्रिलमा नेतेनेहुको सरकारमा समावेश हुन सहमत भएका थिए । जसलाई आपतकालिन गठबन्धन सरकारका रुपमा लिइएको थियो । तर नेतेनेहुले भ्रष्टाचारको अभियोगको सामना गरिरहेकाले गठबन्धन राम्रो भने थिएन ।
नेतेनेहुले सुरुका १८ महिना प्रधानमन्त्री चलाउने र त्यसपछि गान्जलाई दिने सहमति भएको थियो । तर मंगलबार रातीसम्म सांसदहरुले बजेट पारित नगरे सरकार पतन हुने व्यवस्था रहेका कारण सरकार पतन हुन पुगेको छ ।