ट्रम्पले कदम नचालेपछि न्युयोर्कका गभर्नर सरे अगाडि, बेलायतबाट आउँदा नेगेटिभ रिपोर्ट अनिवार्य
प्रकाशित मिति : पुस ६, २०७७ सोमबार
बेलायतमा कोरोनाको नयाँ प्रकार देखिएपछि विभिन्न देशहरुले बेलायतबाट आउनेहरुमा नयाँ प्रतिबन्धहरु लगाउँदासमेत अमेरिकी राष्ट्रपति डोनाल्ड ट्रम्पले वेवास्ता गरिरहेका छन् । तर न्युयोर्कका गभर्नर एन्ड्रयु कुमोले आफ्नै पहलमा ब्रिटिश एयरवेजसँग समन्वय गरेका छन् ।
जस अन्तरगत अब ब्रिटिश एयरवेजमा बेलायतबाट न्युयोर्क आउनेहरुले विमान चढ्नु अगाडि कोरोना परीक्षणको नेगेटिभ रिपोर्ट देखाउनुपर्ने भएको छ । यस्तै नियमका लागि आफूहरुले डेल्टा र भर्जिन एटलान्टिकसँग पनि कुराकानी गरिरहेको कुमोले जनाएका छन् ।
गभर्नर कुमोको अनुरोधपछि ब्रिटिश एयरवेज यो नयाँ नियमका लागि तयार भएको हो । एकदर्जन भन्दा बढी देशहरुले बेलायतबाट आउने उडानमा प्रतिबन्ध लगाएलगत्तै ब्रिटिश एयरवेजले पनि परीक्षण नेगेटिभ भएकाहरुलाई मात्र चढाउन सहमत भएको हो । उनीहरुलाई न्युयोर्कका तर्फबाट कुनै नियम लगाइएको होइन, उनीहरु समन्वयका लागि आफै सहमत भएका हुन् ।
आफू गभर्नरमात्र रहेको तर आफूले न्युयोर्कबासीलाई जोगाउन सकेजति गर्ने कुमोले बताएका छन् । विमानस्थलमा आउने अन्तर्राष्ट्रिय उडानमा कुनै पनि प्रकारका नियमहरु ल्गाउने अधिकार आफूसँग नभएपनि आफ्नो अनुरोध मानेकोमा उनले एयरलाइन्सलाई धन्यवाद दिएका छन् ।
अन्तर्राष्ट्रिय उडानहरुमा नियम लगाउने अधिकार संघीय सरकार र सीबीपीसँगमात्र रहेको छ । त्यसैले न्युयोर्कको राज्य सरकारलाई अन्तर्राष्ट्रिय उडानहरु रोक्ने अधिकार छैन । तर न्युयोर्कको माटोमा आउने भएकाले आइसकेपछि भने नियम लगाउने अधिकार राज्य सरकारलाई रहेको छ ।