तीब्र बनेको कोरोना संक्रमण रोक्न लण्डनमा ‘पूर्ण इमर्जेन्सी लकडाउन’
प्रकाशित मिति : पुस ४, २०७७ शनिबार
तीब्र बनेको कोरोना संक्रमण रोक्न लण्डनसहित इंग्ल्याण्डका विभिन्न क्षेत्रमा इमर्जेन्सी लकडाउनको घोषणा गरिएको छ । संक्रमण बढ्दै गइरहेको अवस्थामा प्रधानमन्त्री बोरिस जोन्सनले शनिबार विशेष सम्बोधनमार्फत साउथ तथा इष्ट इंग्ल्याण्डमा पूर्ण लकडाउनको घोषणा गरेका हुन् ।
यसअघि विभिन्न ३ टिएरमा राखेर क्षेत्रगत रुपमा प्रतिवन्धहरु लागू गरिएकोमा संक्रमण बढ्दै गएपछि थप कडा प्रतिवन्धसहितको टिएर ४ पूर्ण लकडाउनको घोषणा गरिएको हो । यो लकडाउन डिसेम्बर २० आइतबारदेखि २ साताको लागि लागू हुने छ ।
लकडाउनमा अत्यावश्यक बाहेकका सबै पसलहरु बन्द रहनेछन् । अहिले खुला रहेका कपडा पसल, इन्डोर जीमखाना, हेयर ड्रेसर लगायतका व्यवसाय बन्द हुनेछन् ।
सर्वसाधारणलाई अत्यावश्यकबाहेकका अवस्थामा घरभित्रै रहन ’स्टे होम’ को अपील जारी गरिएको छ । काम, शिक्षा, स्वास्थ्य उपचार लगायतका सन्दर्भमा यात्रा गर्नैपर्ने बाहेक अन्य अवस्थामा घरभित्रै बस्नुपर्नेछ ।
यसअघि क्रिसमसका अवसरमा दिने भनिएको ३ परिवारसम्म जमघट हुन पाइने छुट पनि स्थगित गरिएको छ । टिएर ४ बाहेक का क्षेत्रमा पनि उक्त छुट पहिला भनिएजस्तो ५ दिनबाट घटाएर क्रिसमसको दिनलाई मात्रै सिमित गरिएको छ ।
घरबाहिरका सार्वजनिक स्थलमा समेत एकजनाले फरक परिवारका अर्को एकजनालाईमात्र भेट्न पाउनेछन् । तर त्यसमा केही अपवाद भने लागु गरिएको छ । अत्यावश्यक बाहेकका अन्य अन्तर्राष्ट्रिय यात्राहरु नगर्न सुझाव दिइएको छ । टियर ४ क्षेत्रमा पर्नेहरुलाई अरु स्थानमा गएर रात नबिताउन र अरु स्थानका व्यक्ति टियर ४ क्षेत्रमा यात्रा नगर्न भनिएको छ ।
पूर्ण लकडाउन गर्ने टियर ४ क्षेत्र पूरै लण्डन, केन्ट, बकिंघमशायर, बर्कशायर, सर्रेका अधिकांश भागहरु, बेडफोर्डशायर, लुटन, हर्टफोर्डशायर र एसेक्सका अधिकांश भागहरु रहेका छन् । अहिलेका लागि २ साताका लागि पूर्ण लकडाउन हुने भएपनि डिसेम्बर ३० मा पुनरावलोकन गरिने भएको छ ।
बेलायतमा कोभिड–१९ को नयाँ स्वरूप देखिएको र यो इंग्ल्यान्डमा द्रुत गतिमा फैलिइरहेको छ । बेलायती वैज्ञानिकहरूले भाइरसको नयाँ रूपबारे अध्ययन गरिरहेका छन् ।