जर्जियामा चुनाव हार्ने डरले रिपब्लिकन नेता ६ सयको राहत चेकमा सहमत
प्रकाशित मिति : पुस २, २०७७ बिहीबार
जर्जियामा सिनेटका लागि जनवरीको पहिलो साता हुने चुनावमा डेमोक्र्याट्सहरुले राहतको विषयलाई पनि चुनावी नारा बनाएपछि डराएका रिपब्लिकन नेताले राहत प्याकेजमा दोश्रो चरणको ६ सय डलरको राहत चेक थप्नेमा सहमति जनाएका छन् । राहत चेकमा सहमति नजनाएका कारण जर्जियाको चुनावमा नोक्सान हुनसक्ने भएकाले सिनेटमा रिपब्लिकन नेता मिच म्याक्कोनेलले राहत चेकमा सहमति जनाएको न्युयोर्क टाइम्सले रिपोर्ट प्रकाशित गरेको छ ।
व्यक्तिगत फोनकललाई आधार मानेर यस्तो समाचार प्रकाशित भएको हो । जर्जियामा जनवरीको पहिलो साता हुने निर्वाचनले अमेरिकी सिनेटमा शक्ति सन्तुलनलाई निर्धारण गर्नेछ भने जर्जियाको दुईसिटका कारण अमेरिकाको आगामी परिदृश्यमा ठूलो फेरवदल समेत आउनसक्छ ।
जर्जियाको दुबै सिटमा डेमोक्र्याटसहरुले जितेको खण्डमा दुबै सदनमा डेमोक्र्याटसको पकड कायम हुँदा इमिग्रेशन लगायतका कैयन डेमोक्रेटिक एजेण्डाहरु पारित भई अमेरिकाको आगामी परिदृश्य नै परिवर्तन हुनसक्ने सम्भावना रहन्छ ।
राहत चेकमा सहमति नजनाएका कारण जर्जियाको चुनावमा रिपब्लिकनलाई नोक्सान हुनसक्ने भएपछि म्याक्कोनेलले आफ्ना धारणमा ‘युटर्न’ ल्याएको जनाइएको छ । दोश्रो चरणको राहत चेकबारे सहमति नजुटेको बेलामा बुधबार अचानक रिपब्लिकन नेता ६ सय वा ७ सयको चेक पठाउनेमा सहमत भएका थिए ।
ट्रेजरी सेक्रेटरी स्टेभन मन्चिनले गतसाता ल्याएको प्रस्तावमा समेत ६ सय डलरको दोश्रो चरणको राहत चेक समावेश रहेको छ । तर उक्त प्रस्तावमा बेरोजगारी विमाको सन्दर्भमा भने ठूलो कटौती गरिएको छ ।
वार्ताहरु जारी रहँदा नेता बर्नी स्याण्डर्स र डेमोक्रेटिक सांसद अलेक्जान्ड्रिया ओकासियो कोर्टेजले १२ सय डलरको दोश्रो चरणको राहत चेक पठाउनुपर्नेमा जोड दिइरहेका छन् । राहत चेक विनाको प्याकेजलाई आफूहरुले समर्थन नगर्ने उनीहरुको भनाई छ ।
अब दुईदलबीच ९ सय बिलियनको राहत प्योकजमा सहमति हुने सम्भावना देखिएको छ । जसमा ३ सय बिलियन साना विजनेश र अर्को चरणको ऋणका लागि छुट्याइएको छ भने ६ सय डलरको दोश्रो चरणको राहत चेक समावेश गरिएको छ । साथै काम गुमाएकाहरुलाई बेरोजगारी विमाको अतिरिक्त साप्ताहिक ३ सय डलर समेत समेटिएको छ ।
बिहिबार सिनेटको फ्लोरमा बोल्दै रिपब्लिकन नेता मिच म्याक्कोनेलले डेमेक्रेटिक नेताहरुले दुईदलीय राहत प्याकेजमा समर्थन जनाएकोमा खुशी व्यक्त गरेका छन् । यो समयमा यो नै उचित समाधान भएको बताउँदै छिट्टै अन्तिम सहमति हुने उनले जनाएका छन् ।