सांसदहरु राहत प्याकेजमा ‘दोश्रो चरणको राहत चेक’ पनि थप्ने सहमतिको नजिक
प्रकाशित मिति : पुस १, २०७७ बुधबार
सोमबार दोश्रो चरणको राहत चेकविना नै राहत प्याकेजको सार्वजनिक गरेका दुईदलका सांसदहरुले दोश्रो चरणको राहत चेक समेत थप्न सहमतिको नजिक पुगेका छन् । सिनेटमा रिपब्लिकन र डेमोक्रेटिक सांसदहरुको संयुक्त समुहले काम गुमाएहरुलाई बेरोजगार विमा रकमको अतिरिक्त १६ हप्तासम्म अतिरिक्त साप्ताहिक ३ सय डलर समेटिएको ७४८ बिलियन डलरको राहत प्याकेज बिल सार्वजनिक गरेका थिए ।
तर अब उक्त बिलमा दोश्रो चरणको राहत चेक पनि समेटिने सम्भावना बढेको छ । सांसदहरु शुक्रबार बेलुकासम्म अन्तिम सहमतिका लागि दौडधुप गरिरहेका छन् । खर्च विधयेकसँगै राहत प्याकेजपनि पारित गर्नका लागि सांसदहरु लागिपरेका हुन् । शुक्रबारसम्म खर्च विधयेक पारित नभए अमेरिकी सरकार शटडाउन हुनेछ ।
सांसदहरु ६ सय देखि ७ सय डलरसम्मको दोश्रो चरणको राहत चेक पठाउन सहमतिको प्रयास गरिरहेका छन् । यस अगाडि सिनेटमा रिपब्लिकन नेता मिच म्याक्कोनेलले ६ सय डलरको राहत चेक पठाउने प्रस्ताव गरेका थिए ।
सोमबार सार्वजनिक बिलमा राज्यहरुमा सकिन लागेको बेरोजगारी विमानको अवधि पनि ४ महिना थप्ने व्यवस्था गरिएको छ । त्यस्तै साना विजनेशहरुलाई पनि सहयोग समेटिएको छ । क्रिसमसको विदामा जानु अगाडि एउटा राहत प्याकेज संसदबाट पारित हुने सम्भावना अब उच्च देखिएको छ ।
साना विजनेशलाई दोश्रो चरणको राहत र बेरोजगारी विमा रकमको विषयलाई विलमा केन्द्रमा राखिएको छ । सांसदहरुले लामो समयको गतिरोधपछि आएको यो बिललाई क्रिममसको चमत्कार बताएका छन् ।
सोमबार सार्वजनिक गरिएको बिलमा आपतकालिन खाद्य सहायतामा १३ बिलियन, २५ बिलियन भाडा सहायतामा, ३५ बिलियन स्वास्थ्य सेवा प्रदायकहरुका लागि र १३ बिलियन किसानहरुका लागि छुट्याइएको छ । साथै भाडा तिर्न नसकेकाहरुलाई घर निकाला हुनबाट जनवरी ३१ सम्मका लागि संरक्षण प्रदान गरेको छ ।
बर्नी स्याण्डर्स लगायतका सिनेटरहरुले राहत चेक विनाको प्याकेज अगाडि बढ्न नदिने चेतावनी समेत दिएका छन् ।