४ महिना साप्ताहिक ३ सय डलरको व्यवस्थासहित दुईदलीय प्याकेज सार्वजनिक
प्रकाशित मिति : मंसिर २९, २०७७ सोमबार
सिनेटमा रिपब्लिकन र डेमोक्रेटिक सांसदहरुको संयुक्त समुहले काम गुमाएहरुलाई बेरोजगार विमा रकमको अतिरिक्त १६ हप्तासम्म अतिरिक्त साप्ताहिक ३ सय डलर समेटिएको ७४८ बिलियन डलरको राहत प्याकेज बिल सार्वजनिक गरेका छन् । त्यस्तै राज्य र स्थानीय सरकारको सहयोगका लागि १६० बिलियनको अर्को छुट्टै बिल सार्वजनिक गरिएको छ । ९०८ बिलियनको एउटै राहत बिलमा सहमति नभएपछि दुईवटा बिलहरु ल्याइएको हो ।
बिलमा राज्यहरुमा सकिन लागेको बेरोजगारी विमानको अवधि पनि ४ महिना थप्ने व्यवस्था गरिएको छ । त्यस्तै साना विजनेशहरुलाई पनि सहयोग समेटिएको छ । क्रिसमसको विदामा जानु अगाडि एउटा राहत प्याकेज संसदबाट पारित हुने सम्भावना अब उच्च देखिएको छ ।
साना विजनेशलाई दोश्रो चरणको राहत र बेरोजगारी विमा रकमको विषयलाई विलमा केन्द्रमा राखिएको छ । तर बिलमा दोश्रो चरणको राहत चेक भने समेटिएको छैन । सांसदहरुले लामो समयको गतिरोधपछि आएको यो बिललाई क्रिममसको चमत्कार बताएका छन् ।
हाउस स्पीकर न्यान्सी पेलोसीले ट्रेजरी सेक्रेटरी स्टेफन मन्चिनसँगको छलफल जारी राखेकी छिन् । एकसाताका लागि सरकार शटडाउन हुन रोक्नेगरी अस्थायी खर्च विधयेक पारित गरेको संसद समक्ष शनिबारदेखि सरकार शटडाउन हुनबाट रोक्न शुक्रबारसम्म अर्को खर्च विधयेक पारित गर्नुपर्ने बाध्यता रहेको छ ।
आज सार्वजनिक गरिएको बिलमा आपतकालिन खाद्य सहायतामा १३ बिलियन, २५ बिलियन भाडा सहायतामा, ३५ बिलियन स्वास्थ्य सेवा प्रदायकहरुका लागि र १३ बिलियन किसानहरुका लागि छुट्याइएको छ । साथै भाडा तिर्न नसकेकाहरुलाई घर निकाला हुनबाट जनवरी ३१ सम्मका लागि संरक्षण प्रदान गरेको छ ।
दोश्रो चरणको १२ सय डलरको राहत चेकबारे कुनै सहमति कायम हुन नसकेपछि गता साता ह्वाइट हाउसले ६ सय डलरको राहत चेक पठाउनमा सहमति जनाएको थियो । बर्नी स्याण्डर्स लगायतका सिनेटरहरुले राहत चेक विनाको प्याकेज अगाडि बढ्न नदिने चेतावनी समेत दिएका छन् ।