न्युयोर्कमा यसरी लगाइयो पहिलो व्यक्तिलाई कोरोनाबिरुद्धको भ्याक्सिन (फोटो फिचर)
प्रकाशित मिति : मंसिर २९, २०७७ सोमबार
न्युयोर्कमा पहिलो व्यक्तिलाई कोरोनाबिरुद्धको भ्याक्सिन लगाइएको छ । पहिलो भ्याक्सिन लगाइएको प्रत्यक्ष प्रशारण गरिएको थियो । न्युयोर्क समय अनुशार आज विहान ९ बजेर २२ मिनेट जाँदा भ्याक्सिन लगाइएको हो ।
पहिलो भ्याक्सिन फ्रन्टलाइनमा खटिएकी नर्स सान्द्रालाई दिइएको हो । भ्याक्सिन लगाएपछि उनले आफू निकै आशावादी रहेको बताएकी छिन् ।
भिडियो हेर्नुहोस्
अमेरिकाका विभिन्न राज्यमा आज सोमबारदेखि कोरोनाबिरुद्धको भ्याक्सिन लगाउन सुरु गरिएको छ । न्युजर्सी लगायतका कतिपय राज्यमा मंगलबारदेखि लगाइनेछ ।
अमेरिकन सीडीसीले १६ बर्ष र त्यो भन्दा माथिको उमेरकाहरुलाई फाइजरको कोरोनाबिरुद्धको भ्याक्सिन लगाउन सकिनेगरी स्वीकृति प्रदान गरिसकेको छ भने एफडीएले शुक्रबार नै भ्याक्सिन स्वीकृत गरेको थियो ।
मिसिगनको फाइजर प्लान्टबाट कोरोनाबिरुद्धका भ्याक्सिन बोकेका ट्रकहरु कतिपय राज्यमा आइसकेका छन् । भ्याक्सिनका १ लाख ८४ हजार २ सय ७५ शीशीहरु बोकेर ट्रकहरु ५० वटै राज्यतिर प्रस्थान गरेका थिए ।
अरु ३ लाख ९० हजार शीशी सोमबार ४ सय वटा बक्समा प्याक गरेर पठाइने भएको छ । ती शीशीहरु मंगलबारसम्म राज्यहरुमा आइपुग्ने जनाइएको छ । हरेक शीशीमा पाँच डोज भ्याक्सिन रहेको फाइजरले जनाएको छ ।
फाइजरले यसैसातामात्र युपीएस र फेडेक्समार्फत २ दशमलव ९ मिलयन भ्याक्सिनका डोजहरु डेलिभर गर्ने भएको छ । अमेरिकाको सैन्य टोलीको स्कर्टिङमा भ्याक्सिनहरु पठाइएको हो ।
फाइजरले मिसिगन, मिजौरी र मासाचुसेट्समा रहेका प्लान्टहरुमा भ्याक्सिनका डोजहरु उत्पादन गरिरहेको छ । फाइजरका भ्याक्सिन यो शताब्दीकै सबैभन्दा खतरनाक महामारीको अन्त्यका लागि सहयोगी सावित हुने अपेक्षा गरिएको छ ।
फाइजरको कोभिड १९ भ्याक्सिन अमेरिकामा प्रयोगको स्वीकृति पाउने पहिलो भ्याक्सिन हो । अमेरिकाले आगामी मार्चभित्र १ सय मिलियनलाई भ्याक्सिन लगाउने योजना बनाएको छ ।
फाइजर भ्याक्सिन ९५ प्रतिशत प्रभावकारी रहेको छ । भ्याक्सिनका दुईवटा डोजहरु दिनुपर्ने र २१ दिनको अन्तरमा दुईवटा डोज प्रदान गरिने भएको छ । एउटामात्र डोजपछि भ्याक्सिनले कोरोना संक्रमण हुनबाट ८२ प्रतिशतसम्म रोक्न प्रभावकारी हुने जनाइएको छ । तर दुबै डोज दिएपछि भने ९५ प्रतिशतसम्म प्रभावकारी हुनेछ ।
फाइजर र बायोएनटेकको खोपले आनुवंशिक कोडहरूलाई प्रयोग गरेर रोग प्रतिरोधी प्रतिक्रिया निम्त्याउँछन् र यसलाई एमआरएनए खोप भनिन्छ। यसले मानव कोषमा फेरबदल गर्दैन बरू शरिरलाई कोभिड विरुद्ध प्रतिरोधी हुन तयार रहने हिसाबको निर्देशन दिन्छ।
खोपका कारण रोग लाग्दैन। बरु तोकिए बमोजिमका सङ्क्रमण पहिचान गर्न र त्यससँग जुध्न उनीहरूले हाम्रो शरिरको रोग प्रतिरोधी प्रणालीलाई सिकाउँछन्।
केही व्यक्तिहरूलाई खोप लगाएपछि मांसपेशी दुख्ने वा ज्वरो आउने जस्ता मध्यम खालका लक्षण देखिएको जनाइएको छ । यो रोग नभइ खोपका कारण शरिरमा उत्पन्न प्रतिक्रिया हो। खोपका कारण अरू एलर्जीहरू देखा पर्नु एकदमै दुर्लभ हो।
मोडेर्नाले उत्पादन गरेको भ्याक्सिन प्रयोगको स्वीकृतिका लागि पनि आवेदन दिइएको छ । मोडेर्ना भ्याक्सिन फाइजरको तुलनामा भण्डारण र वितरणमा सहज हुने जनाइएको छ ।
यसैबीच अमेरिकी सरकारले कोरोनाबिरुद्धको मोडेर्ना भ्याक्सिनका थप एकसय मिलियन डोज किन्ने भएको छ । मोडेर्नाको भ्याक्सिन अमेरिकाले आगामी साता प्रयोगका लागि स्वीकृत गर्ने अपेक्षा गरिएको छ ।
प्रयोगको स्वीकृति पाएमा मोडेर्नाले यसै महिना २० मिलियन डोज प्रदान गर्नेछ भने ८० मिलियन डोज जनवरीमा प्रदान गर्नेछ । अब अमेरिकासँग मोडेर्ना भ्याक्सिनका कुल २ सय मिलियन डोज हुनेछन् । अमेरिकासँग मोडेर्नाबाट अरु ३ सय मिलियन डोज भ्याक्सिन किन्ने विकल्प रहेको छ ।
अहिलेसम्म अमेरिकाले मोडेर्ना र फाइजरबाट ३ सय मिलियन डोज भ्याक्सिन सुरक्षित गरिसकेको छ । जुन आधाभन्दा कम जनसंख्याका लागिमात्र प्रयाप्त हुनेछ । दुई डोज भ्याक्सिन दिनुपर्ने भएकाले उक्त भ्याक्सिन १५० मिलियनलाई प्रयाप्त हुनेछ ।