ट्रम्पबाट अमेरिकन भ्याक्सिन पहिले अमेरिकनलाई लगाएर मात्र बाँकी विश्वलाई दिने कार्यकारी आदेश


प्रकाशित मिति : मंसिर २३, २०७७ मंगलबार

अमेरिकामा उत्पादित कोरोनाबिरुद्धको भ्याक्सिनको पहिलो प्राथमिकता अमेरिकनलाई दिने कार्यकारी आदेशमा राष्ट्रपति डोनाल्ड ट्रम्पले हस्ताक्षर गरेका छन् । कार्यकारी आदेशले अमेरिकामा बनेको भ्याक्सिनमा पहिलो पहुच अमेरिकन नागरिकको हुने कुरा सुनिश्चित गर्ने ट्रम्पले बताएका छन् । त्यसपछिमात्र विश्वका अरु देशसँग आफूले काम गर्ने उनको भनाई छ ।

अमेरिकाको खाद्य तथा औषधी प्रशासनले कोरोनाबिरुद्धको भ्याक्सिन स्वीकृत गर्न अब केहीदिनमात्र बाँकी रहेको बताउँदै ट्रम्पले स्वीकृति पाउनासाथ भ्याक्सिनको आम वितरण सुरु गरिहाल्ने बताएका छन् । भ्याक्सिन वितरणका लागि देशभर ४० हजारभन्दा धेरै वितरण स्थल बनाइएको र अमेरिकनहरुले त्यहाँबाट निशुल्क भ्याक्सिन प्राप्त गर्ने ट्रम्पले बताएका छन् ।

ट्रम्पले आवश्यक परेमा रक्षा उत्पादन ऐन सकृय बनाउने समेत बताएका छन् । यो  ऐन अन्तरगत राष्ट्रपतिले अमेरिकामा रहेका उद्योगहरुलाई राष्ट्रिय सुरक्षाका लागि सामानहरु उत्पादन गर्न लगाउन दबाब दिन सक्छन् ।

अमेरिकाको खाद्य तथा औषधी प्रशासनले डिसेम्बर १० मा फाइजरको भ्याक्सिनलाई स्वीकृति दिने तयारी गरेको छ भने डिसेम्बर १७ मा मोडेर्नाको भ्याक्सिनलाई स्वीकृति दिने तयारी गरेको छ । त्यो भन्दा अगाडि नै अमेरिकालाई प्राथमिकता सुनिश्चित गर्न ट्रम्पले कार्यकारी आदेश जारी गरेका हुन् ।

आगामी समरको सुरुवातसम्म सबै अमेरिकनले भ्याक्सिनमा पहुच कायम गर्ने अपेक्षा गरिएको छ । त्यसपछिमात्र अमेरिकाले विदेशमा भ्याक्सिन सम्बन्धि सहायता गर्नसक्ने पक्षमा ट्रम्प रहेका छन् ।

कोरोनाबिरुद्धको भ्याक्सिनमा सर्वसाधारणको विश्वास बढाउन पूर्व अमेरिकी राष्ट्रपतिहरु बिल क्लीन्टन, बराक ओबामा र जर्ज डब्ल्यु बुससँगै नवनिर्वाचित राष्ट्रपति जो बाइडेनले पनि कोरोनाबिरुद्धको भ्याक्सिन सार्वजनिक रुपमा लिने भएका छन् । उनीहरुले अमेरिकाको खाद्य तथा औषधी प्रशासनबाट स्वीकृति प्राप्त भएपछि सर्वधारणहरुको हिचकिचाहट कम गर्न आफैले भ्याक्सिन लिने घोषणा गरेका हुन् ।

डाक्टर फाउचीले भ्याक्सिन सुरक्षित भएको बताएपछि र एफडीएबाट स्वीकृत भएपछि आफूले सार्वजनिक रुपमा नै भ्याक्सिन लिन इच्छुक रहेको बाइडेनले बताए ।

ओबामाले भ्याक्सिन लिएको भिडियो समेत टेलिभिजनबाट प्रशारण गरिने भएको छ । आफूले विज्ञानलाई विश्वास गर्ने ओबामाले बताएका छन् ।

त्यस्तै पूर्व अमेरिकी राष्ट्रपति जर्ज डब्ल्यु बुसले पनि अमेरिकाका बरिष्ठ सुरुवा रोग विशेषज्ञ एन्थोनी फाउचीलाई सम्पर्क गरेर सार्वजनिक रुपमा भिडियो नै खिच्नेगरी कोरोनाबिरुद्ध भ्याक्सिन लिने बताएका छन् । भ्याक्सिन सुरक्षित भएको प्रमाणि भएर एफडीएले स्वीकृति दिएपछि आफूले लिने उनको भनाई छ ।

त्यस्तै पूर्व अमेरिकी राष्ट्रपति बिल क्लीन्टनका प्रेस सेक्रेटरीले पनि भ्याक्सिन उपलब्ध हुनासाथ क्लीन्टनले लिने जानकारी दिएका छन् । सबै अमेरिकनलाई भ्याक्सिन लिनका लागि प्रोत्साहन गर्न क्लिन्टन पनि सार्वजनिक रुपमा नै भ्याक्सिन लिन तयार भएका छन् ।

पहिलो चरणमा भ्याक्सिन स्वास्थ्यकर्मीहरु र आश्रममा दीर्घकालिन हेरचाहमा रहेकाहरुलाई प्रदान गरिने जनाइएको छ । आत्मनिर्भर भएर बाँच्न नसक्ने हेरचाह केन्द्रमा रहेकाहरुलाई प्राथमिकतामा राखिएको सीडीसीले जनाएको छ ।

६ प्रतिशत कोरोनाका केसहरु दीर्घकालिन हेरचाह केन्द्रमा रहेकाहरुमा रहेको र अमेरिकाभर ४० प्रतिशत मृत्यु उनीहरुको भएको सीडीसीले जनाएको छ । त्यस्तै साढे २ लाख भन्दा धेरै स्वास्थ्यकर्मीहरुलाई कोरोना संक्रमण भएको सीडीसीले जनाएको छ । जसमध्ये ८ सय ५८ जनाको मृत्यु भएको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com