अस्पताल भर्ना हुने दर बढेमा सोमबारदेखि न्युयोर्कमा ‘इन्डोर डाइनिङ’ बन्द हुनसक्ने
प्रकाशित मिति : मंसिर २२, २०७७ सोमबार
ज्याक्सनहाइटमा आउटडोर खानाखाने स्थल बनाएर संचालित रेष्टुरेण्ट । फोटो : खसोखास
न्युयोर्कका गभर्नर एन्ड्रगु कुमोले आगामी सोमबारदेखि न्युयोर्क सिटीमा रेष्टुरेण्टभित्र खाना खानमा प्रतिबन्ध लगाइने बताएका छन् । आगामी ५ दिनमा पनि न्युयोर्क सिटीमा कोरोना संक्रमणबाट अस्पताल भर्ना हुनेको संख्यामा स्थीरता नआए सोमबारदेखि रेष्टुरेण्टभित्र खाना खानमा प्रतिबन्ध लगाइने उनले बताए ।
अहिलेसम्म रेष्टुरेण्टभित्र २५ प्रतिशत क्षमतामा खानखान पाइने नियम भएतापनि संक्रमणबाट बिरामी भई अस्पताल भर्ना हुनेहरुको संख्या बढ्न थालेपछि पूर्णरुपमा बन्द गर्ने योजना बनाइएको हो । न्युयोर्कमा चिसो बढिसकेकाले आउटडोर डाइनिङ सहज नभएको अवस्थामा उक्त नियम लागु भएमा रेष्टुरेण्टहरुले टेकआउट र डेलीभरीमात्र गर्न सक्नेछन् ।
त्यस्तै न्युयोर्क सिटीबाहिर पनि इन्डोर डाइनिङ ५० प्रतिशत क्षमताबाट २५ प्रतिशतमा झार्ने योजना बनाइएको छ । तर न्युयोर्कबासीले यो साता आफ्नो व्यवहार परिवर्तन गरेमा र अस्पताल भर्ना हुने दरमा कमी आएमा भने इन्डोर डाइनिङ बन्द गरिने छैन । न्युयोर्कबासीले अपनाउने सावधानीमा यो कुरा भर पर्ने गभर्नर कुमोले बताएका छन् ।
शुक्रबारको सीडीसीको निर्देशिका अनुशार काम गरिने कुमोले बताएका हुन् । सीडीसीले जिम र शैलुनका सन्दर्भमा उस्तै निर्देशिका नबनाएकाले जिम र शैलुन भने बन्द नहुने जनाइएको छ । गभर्नर कुमोले डाक्टर एन्थोनी फाउचीको ब्रिफिङमा बोल्दै यो कुरा बताएका हुन् । डाक्टर फाउचीले विजनेजका मालिकका लागि आर्थिक सहयोग सहित बन्दको योजना ल्याउनुपर्नेमा जोड दिएका छन् ।
बारहरु बन्द गर्ने र विद्यालयहरु खोल्ने योजना सही भएपनि रेष्टुरेण्ट र बारहरु आर्थिक समस्याका कारण समाप्त हुने अवस्था भने आउन दिन नहुने फाउचीले बताए । संघीय सरकारले बार, रेष्टुरेण्ट लगायतका विजनेशलाई सहयोगका लागि राहत प्याकेजहरु ल्याउनुपर्ने कुमोको भनाई थियो ।