टेक्सासमा प्राकृतिक रुपमा मृत्यु भएका ठानिएका २२ बृद्धाको सिरियल किलरबाट हत्या
प्रकाशित मिति : मंसिर २०, २०७७ शनिबार
अमेरिकाको टेक्सासमा प्राकृतिक रुपमा मृत्यु भएका ठानिएका २२ बृद्धाको सिरियल किलरबाट हत्या भएको प्रहरीले दावी गरेको छ । सुरुमा उनीहरुको मृत्यु प्राकृतिक रुपमा लडेर वा ठोक्किएर भएको ठानिएपनि प्रहरीले अनुसन्धानपछि उनीहरुको सिरियल किलरबाट हत्या भएको दावी गरिएको हो ।
पूर्व हेल्थ केयर वर्कर बिली चेमिरमिरलाई टेक्सासको डलास र कोलिन काउन्टीमा १४ जना बृद्धबृद्धाको हत्या गरेको अभियोग अधिकारीहरुले दर्ता गरेका छन् । ४७ बर्षकी बिलीले सन् २०१६ देखि सन् २०१८ को बीचमा उनीहरुको हत्या गरेको अधिकारीहरुको दावी छ । त्यो बाहेक अरु कम्तीमा ८ जना बृद्धबृद्धाको हत्या पनि बिलीले गरेको आंशका गरिएको छ ।
बिलीले बृद्धबृद्धाको हत्याका लागि हेल्थकेयरको अनुभव प्रयोग गरेको जनाइएको छ । समुदायमा रहेका अशक्तहरुलाई निशाना बनाएको र यो घटना अत्यन्तै दर्दनाक रहेको प्रहरीले जनाएको छ । बिलीले भने आफूबिरुद्धका अभियोगहरु स्वीकार गरेका छैनन् । उनका वकिलले उनीबिरुद्धका अभियोगहरु परिस्थीतिजन्य भएको दावी गरेका छन् ।
तर अधिकारीहरुले भने बिली नै हत्यामा संलग्न भएका प्रमाणको खात रहेको बताएका छन् । भिडियो, डीएनए रेकर्ड र प्रत्यक्षदर्शी समेत रहेको जनाइएको छ । बिलीले हत्याको प्रयास गरेका ९१ बर्षकी एक बृद्धा समेत त्यसको प्रमाण रहेको जनाइएको छ । ती बृद्धा बाँच्न सफल भएकी थिइन् ।
केन्याका आप्रवासी बिली अमेरिकाका ग्रिनकार्डवाहक रहेको जनाइएको छ । उनलाई अहिले डलास काउन्टी जेलमा राखिएको छ भने साढे ११ मिलियन डलर जमानत तोकिएको छ । उनको सुनुवाई २०२१ मा हुने तय भएको छ ।
हत्या गरिएकीमध्ये एकजना डायन डेलहन्टी रहेकी थिइन् । ७९ बर्षकी ती बृद्धा अपार्टमेन्टमा मृत फेला परेकी थिइन् । उनको टाउकोमा चोट लागेको थियो । सुरुमा उनी विस्ताराबाट लडेर टाउकोमा चोट लागेका कारण मृत्यु भएको अनुमान गरिएको थियो । त्यीतेबला उनका औंठीहरु समेत हराएका थिए । अहिले उनको मृत्यु नभई हत्या भएको प्रहरी अनुसन्धानबाट खुलेको छ ।
बिलीले अधिकांश बृद्धाहरुलाई सिरानीले च्यापेर मारेको र गहनाहरु लुटेको प्रहरीले जनाएको छ । एकजना बृद्धलाई सिरानीले च्यापेर बेहोस बनाएपछि बिलीले उनका गहना र बहुमुल्य सामानहरु लुटेपनि ती बृद्धा पछि चमत्कारिक रुपमा बाँचेकी थिइन् । त्यसपछि घटनाको रहस्य खुल्दै गएको थियो ।
