पेन्टागनमा बाइडेनको टिमलाई पहुच, ट्रम्पका बफादार काश्यप पटेलको रोक्ने प्रयास असफल
प्रकाशित मिति : मंसिर २०, २०७७ शनिबार
ट्रम्प प्रशासनले रक्षा मन्त्रालय अन्तरगतका खुफिया एजेन्सीहरु सदस्यहरुसँगका बैठकमा नवनिर्वाचित राष्ट्रपति जो बाइडेनको टिमलाई पहुच कायम गर्नबाट रोकेको समाचार पेन्टागनले अस्वीकार गरेको छ । पेन्टागनले शनिबार रक्षा मन्त्रालय सहज तरिकाले सत्ता हस्तान्तरणमा सकारात्मक रहेको बताएको छ ।
वासिंटन पोष्ट र अन्य अमेरिकी संचारमाध्यमहरुले रक्षा मन्त्रालयका राष्ट्रिय सुरक्षा एजेन्सीका नेताहरुलाई बाइडेनको टिमसँग भेट्नमा रोक लगाइएको समाचार प्रकाशित गरेका थिए । त्यस्तै रक्षा मन्त्रालयको खुफिया एजेन्सी र अन्य सैन्य जासुसी सेवाका अधिकारीहरुलाई पनि भेट्नमा बाइडेनको टिमलाई रोकिएको जनाइएको थियो ।
तर शनिबार कार्यवाहक रक्षामन्त्री क्रिस्टोफर मिलरले एक वक्तब्य जारी गर्दै रक्षा मन्त्रालय र अहिलेको संक्रमणकालिन नेतृत्वले बाइडेनको टिमसँग पूर्णरुपमा समन्वय गरिरहेको बताएका छन् । पेन्टागनले बाइडेनको टिमसँग दर्जनौं भेटघाट र अन्तरवार्ताहरु भइसकेको तथा आगामी साताहरुमा कैयन भेटघाटहरु तय भएको समेत जनाएको छ ।
यद्यपी बाइडेनको टिमले रक्षामन्त्रालयका खुफिया समुदायका सदस्यहरुलाई भेट्न भने अझै पनि बाँकी रहेको जनाइएको छ । बाइडेनको टिमले रक्षा मन्त्रालयको सत्ता हस्तान्तरण समुहसँग सम्पर्क गर्नुपर्नेमा सिधै एजेन्सीहरुलाई सम्पर्क गरेका कारण भेटघाटमा रोक लगाइएको थियो भने र बाइडेनको टिमलाई पेन्टागनमा अनुरोध पठाउन भनिएको थियो ।
तर यो समस्याको पनि समाधान भइसकेको जनाइएको छ । सोमबार र मंगलबार रक्षा मन्त्रालय सम्बन्धित खुफिया एजेन्सी र समुदायसँग बाइडेनको टिमको बैठकहरु समेत आयोजना गरिएको छ ।
यसअगाडि डोनाल्ड ट्रम्पका बफदार काश्यप प्रमोद पटेलले बाइडेनको टिमलाई पेन्टागनमा खुफिया एजेन्सीहरुसँगको बैठकका लागि पहुच कायम गर्नमा रोक लगाउने प्रयास गरेका थिए । पटेल रक्षा मन्त्रालयका कार्यवाहक रक्षामन्त्री मिलरका चिफ अफ स्टाफ हुन् । पटेललाई गत महिनाको चुनावपछि चिफ अफ स्टाफ बनाइएको थियो ।