अक्टोबरमा ट्रम्प प्रशासनले अफर गरेको भन्दा आधा सानो राहत प्याकेजमा पेलोसीको समर्थनको बचाउ
प्रकाशित मिति : मंसिर १९, २०७७ शुक्रबार
अक्टोबरमा ट्रम्प प्रशासनले अफर गरेको भन्दा आधा सानो राहत प्याकेजमा हाउस स्पीकर न्यान्सी पेलोसीले समर्थन गरेकोमा उनले यसो गर्नु गल्ती नभएको भन्दै आफ्नो वचाउ गरेकी छिन् । ट्रम्प प्रशासनले अक्टोबरमा १ दशमलव ८ ट्रिलियनका राहत प्याकेज अफर गरेकोमा अहिले पेलोसीले त्यसको आधा अर्थात् ९०८ बिलियनको राहत प्याकेजमै समर्थन जनाएकी छिन् ।
पेलोसीले शुक्रबार पत्रकार सम्मेलनमा बोल्दै विगतमा आफूहरुले २ दशमलव २ ट्रिलियन डलरका लागि लिएको अडानले नतिजा देखाएको बताएकी छिन् । त्यो गल्ती नभएको र विगतको निर्णयका कारण नै अरुबिना नै सही काम गर्न सकिने स्थानमा आइपुगेको उनले बताइन् । नयाँ राष्ट्रपति र भ्याक्सिन पूर्णरुपमा गेम चेन्जर रहेको उनले बताइन् ।
पेलोसीको पछिल्लो प्रतिकृयाले विगतमा लिएको उनको अडानमा परिवर्तन भएको देखिएको छ । उनले कैयन महिना राहत प्याकेजबारे ट्रेजरी सेक्रेटरी स्टेभन मन्चिनसँगको वार्तामा विताएकी थिइन् । अन्त्यमा ह्वाइटहाउसले १ दशमलव ८ ट्रिलियन डलरको राहत प्याकेज प्रस्ताव अगाडि सारेको थियो । जसलाई उनले अस्वीकार गरेकी थिइन् ।
पछिल्लो सानो आकारको राहत प्याकेजमा बेरोजगारी विमा रकमका अतिरिक्त संघीय सरकारबाट अतिरिक्त साप्ताहिक ३ सय डलर प्रदान गर्ने, साना विजनेशहरुलाई सघाउने र जनस्वास्थ्यका लागि खर्च गर्ने लगायतका विषय समेटिएको छ । तर यो प्याकेजमा दोश्रो चरणको १२ सय डलरको राहत चेक भने समेटिएको छैन ।
संसदसमक्ष डिसेम्बर ११ अगाडि खर्च सम्बन्धि पारित गर्नुपर्ने बाध्यता पनि रहेको छ । यदि डिसेम्बर ११ अगाडि खर्च सम्बन्धि बिल पारित नगरे सरकार शटडाउन हुनेछ । आफू र सिनेटका रिपब्लिकन नेता मिच म्याक्कोनेल सरकारी खर्च विधयेकसँगै जोडेर राहत प्याकेज पारित गर्न सहमत भएको पेलोसीले बताइन् ।
यो राहत प्याकेज छोटो समयका लागि भएको र नयाँ संसदको सेसन सुरु भएपछि तथा जो बाइडेन राष्ट्रपति भएपनि अरु राहतका कार्यक्रम ल्याउने उनले संकेत गरिन् । जो बाइडेनले पनि यो सानो आकारको राहत प्याकेजलाई डाउन पेमेन्टको संज्ञा दिदै यसको समर्थन गरेका छन् ।
