प्रमुख मेडिकल सल्लाहकार बन्न बाइडेनले गरेको प्रस्ताव फाउचीबाट स्वीकार
प्रकाशित मिति : मंसिर १९, २०७७ शुक्रबार
नवनिर्वाचित अमेरिकी राष्ट्रपति जो बाइडेनले आफ्नो प्रमुख मेडिकल सल्लाहकार बन्नका लागि गरेको प्रस्ताव अमेरिकाका बरिष्ठ सरुवा रोग विशेषज्ञ डाक्टर एन्थोनी फाउचीले स्वीकार गरेका छन् । फाउची अमेरिकाको एलर्जीे र संक्रामक रोग राष्ट्रिय प्रतिष्ठानका निर्देशक हुन् भने ट्रम्प प्रशासनको ह्वाइट हाउस कोरोनाभाइरस टास्क फोर्सका सदस्य समेत हुन् ।
फाउची विश्वमै संक्रामक रोग सम्बन्धि अग्रस्थानमा रहेका बरिष्ठ विशेषज्ञ हुन् । द न्युयोर्कर र न्युयोर्क टाइम्सले फाउचीलाई अमेरिकामा सबैभन्दा बढी विश्वास गर्न सकिने मेडिकल फिगरका रुपमा व्याख्या समेत गरेको थियो ।
फाउचीले शुक्रबार बाइडेनको प्रस्ताव आफूले स्वीकारेको खुलासा गरे । आफूले ‘अन द स्पट’ बाइडेनको प्रस्ताव स्वीकार गरेको फाउचीले बताए । उनले एलर्जी र सरुवा रोगको राष्ट्रिय प्रतिष्ठानमा निर्देशकका रुपमा पनि काम जारी नै राख्नेछन् । उनी सन् १९८४ देखि यो पदमा कार्यरत छन् । उनी यो पदमा आएदेखि अमेरिकामा ६ राष्ट्रपति आइसकेका छन् । बाइडेन सातौं हुनेछन् ।
बाइडेनले बिहिबार फाउचीसमक्ष यस्तो प्रस्ताव राखेको बताएका थिए । सीएनएनमा कमला ह्यारिससँगको संयुक्त अन्तरवार्तामा बाइडेनले फाउचीलाई कोभिड टिमका रुपमा काम गर्न र प्रमुख मेडिकल सल्लाहकारका रुपमा काम गर्न आग्रह गरेको बताएका थिए ।