दुईदलका सांसदले ल्याए राहतचेक नसमेटिएको तर बेरोजगारी राहत समेटिएको प्याकेज प्रस्ताव
प्रकाशित मिति : मंसिर १६, २०७७ मंगलबार
अमेरिकी संसदको तल्लो सदन प्रतिनिधिसभाका डेमोक्रेटिक र रिपब्लिकन सांसदहरुलको एउटा समुहले दोश्रो चरणको राहत चेक नसमेटिएको तर काम गुमाएकाहरुलाई बेरोजगारी विमा रकमका अतिरिक्त राहत रकम उपलब्ध गराउने योजना सहितको राहत प्याकेज प्रस्ताज ल्याएका छन् । यो प्रस्ताव १ ट्रिलियन डलरभन्दा पनि कम अर्थात् ९०८ बिलियन डलरकोमात्र रहेको छ ।
प्याकेज प्रस्ताजमा स्थानीय र राज्य सरकारलाई सहायता, साना विजनेशलाई सहायता लगायत समेटिएको छ । जस अनुशार १६० बिलियन डलर राज्य र स्थानीय सरकारको सहायताका लागि छुट्याइएको छ भने २८८ बिलियन साना विजनेशका लागि छुट्याइएको छ । ८२ बिलयन शिक्षामा र १६ बिलियन भ्याक्सिन विकाश र वितरणका लागि छुट्याइएको छ । काम गुमाएकाहरुलाई राहतका लागि १८० बिलियन डलर छुट्याइएको छ ।
यो प्याकेज प्रस्तावमा ह्वाइटहाउस र सिनेटको समर्थन हुने नहुने भने स्पष्ट छैन । तर केही सिनेटरहरुले तत्काल राहत प्याकेज आवश्यक भएको बताएका छन् । ट्रेजरी सेक्रेटरी स्टेभन मन्चिन र हाउस स्पीकर न्यान्सी पेलोसीबीच महिनौंदेखिको वार्ता निष्कर्षमा पुग्न नसकेको बेलामा यो राहत प्याकेज प्रस्ताव आएको हो ।
अमेरिकामा कोरोना संक्रमितको संख्या १३ मिलियन नाघिसकेपनि संसदले अमेरिकनहरुका लागि जुलाई ३१ पनि कुने राहत प्याकेज पारित गर्न सकेको छैन । जसका कारण दोश्रो चरणको राहत चेक पाउने आशामा रहेका र बेरोजगारी विमा रकमको अतिरिक्त रकम पाउने आशामा रहेकाहरु निराश छन् ।
के डिसेम्बर ३१ अगाडि दोश्रो चरणको १२ सय डलरको राहत चेक आउन सम्भव होला ? यो प्रश्न यतिबेला धेरैका मनमा उब्जिएको छ । संसदहरु काममा फर्किसकेका छन् । तर सरकार शटडाउन हुनबाट रोक्न उनीहरुलाई बजेट पारित गर्नुपर्ने चटारो रहेको छ । बाइडेनको टिम जनवरीमा सत्ता सम्हाल्ने तयारीमा नै व्यस्त रहेको छ । कैयन अमेरिकनहरु गरिबीमै क्रिसमस मनाउने तयारीमा लागेका छन् ।
नोभेम्बर ३० मा वासिंटन डिसी फर्केका सांसदहरुले चाहेको खण्डमा राहत प्याकेज पारित हुनसक्छ । तर गत मार्चमा पारित भएको जस्तो राहत प्याकेज पारित हुने सम्भावना तत्काल नभएको कैयन अर्थशास्त्रीहरुको भनाई छ । मार्चमा पारित २ दशमलव २ ट्रिलियनको राहत प्याकेज अन्तरगत अधिकांश अमेरिकनहरुले १२ सय डलरको चेक प्राप्त गरेका थिए ।
तर नयाँ राहत प्याकेजका सन्दर्भमा डेमोक्र्याट्स र रिपब्लिकनहरुबीच अझै पनि कुनै सहमति कायम भएको छैन । विभिन्न राज्यहरुलाई राहत रकम दिनेदेखि बेरोजगारी विमाका अतिरिक्त प्रदान गरिने रकमका सन्दर्भमा समेत दुईदलबीच मतभेद कायम रहेको छ ।
संसदले डिसेम्बरमा राहत प्याकेज पारित गरेमा पनि राहत चेक पठाउन भने आईआरएसलाई केहीसमय लाग्नसक्नेछ । आईआरएसलाई त्यसका लागि केही हप्ता लाग्ने जनाइएको छ । राहत प्याकेज पारित भएमा पनि कैयन चेक हुलाकमार्फत पठाउनुपर्ने भएकाले राहत चेक प्राप्त गर्न एकदेखि ३ महिनासम्म लाग्नसक्छ ।
यसैबीच कैयनले प्राप्त गरिरहेको बेरोजगारी विमा रकमको अवधि समाप्त हुन लागेको छ भने भाडा तिर्न नसकेका कारण घरनिकाला हुनबाट जोगाउने आदेशको अवधि पनि डिसेम्बरको अन्त्यमा सकिदैछ । तत्काल कुने राहत पारित नभए नयाँ बर्ष सुरु हुनासाथ अमेरिकामा कैयन होमलेस हुने सम्भावना रहेको छ ।
भाडा नतिरेका कारण घर निकाला हुनबाट जोगाउने अवधि समाप्त भएपछि अमेरिकामा डिसेम्बरको अन्त्यपछि ६७ लाख व्यक्ति घरनिकालाको जोखिममा हुनेछन् । क्रिसमस लगत्तै १ करोड २० लाख भन्दा बढीको बेरोजगारी विमा रकम पाउने अवधि समाप्त भई रकम प्राप्त हुन बन्द हुनेछ ।
यसैबीच दोश्रो चरणमा १२ सय डलरको राहत चेक पठाउन आग्रह गर्दै १२५ भन्दा बढी अर्थशास्त्रीहरुले अमेरिकी संसदलाई खुलापत्र लेखेका छन् । कोरोनाको महामारीमा दोश्रो चरणको राहत प्याकेज पारित नभएको अवस्थामा अर्थशास्त्रीहरुले यस्तो आव्हान गरेका हुन् ।
अर्थतन्त्रलाई पुनर्जीवन दिनका लागि अमेरिकनहरुको खातामा दोश्रो चरणको राहत चेक पठाउनु सबैभन्दा छिटो र उपयुक्त उपाय हुने उनीहरुले बताएका छन् । यसरी सरकारले राहत चेक पठाएमा अमेरिकी परिवारको आर्थिक अवस्थामा सहीमार्गमा आउने र अमेरिकी अर्थतन्त्रमा सकारात्मक असर पर्ने उनीहरुको भनाई छ ।
पूर्व अमेरिकी राष्ट्रपति बराक ओबामाका लागि काम गरेका बरिष्ठ अर्थशास्त्री ज्यासन फर्मयान, फेडरल रिजर्भ बोर्डका पूर्व उपाध्यक्ष एलन ब्लाइन्डर लगायतले उक्त खुलापत्र लेखेका हुन् । अर्थशास्त्रीहरुले अमेरिकामा गरिबी बढ्नबाट रोक्ने सबैभन्दा महत्वपूर्ण साधन राहत चेक भएको बताएका छन् ।
बेरोजगारी विमामा अतिरिक्त रकम पनि जुलाई अन्तिम देखि समाप्त भइसकेको छ । जुलाईको अन्तिमसम्म बेरोजगारी विमामा साप्तहिक ६ सयका दरले अतिरिक्त रकम प्रदान गरिएको थियो । तर नयाँ राहत प्याकेजमा सहमति कायम हुन नसक्दा त्यसयता अमेरिकनहरु गरिबीतिर धकेलिएका छन् ।