फूटवल आइकन म्याराडोनाको निधन
प्रकाशित मिति : मंसिर १०, २०७७ बुधबार
फूटवल आइकन डिएगो म्याराडोनाको ६० बर्षको उमेरमा निधन भएको छ । अर्जेन्टिनाको गौरवपूर्ण फूटवल इतिहासको नेतृत्व गरेका म्याराडोनाको हृदयघातबाट निधन भएको हो ।
उनी अहिलेसम्मकै उत्कृष्ट फूटवल खेलाडीका रुपमा परिचित छन् । गतमहिना उनको मष्तिष्कमा जमेको रगतको थोपा हटाउन सर्जरी गरिएको थियो ।
म्याराडोनाले सन् १९८६ को विश्वकप फुटवलमा अर्जेन्टिनाको नेतृत्व गरेका थिए । उनले इटली र अर्जेन्टिनामा लिग च्याम्पियनसिप समेत जितेका थिए ।
सन् १९८६ को विश्वकपमा इंग्लयाण्डलाई पाखा लगाउने २ गोल गरेका कारण उनी गोल्डेन ब्वाईका रुपमा परिचित भएका थिए । उनको निधनबाट विश्वको खेलजगत स्तब्ध भएको छ ।
उनले अर्जेन्टिनाका लागि चारवटा विश्वकप खेले भने ९१ खेलमा ३४ गोल गरे। सन् १९९० को विश्वकपमा पनि अर्जेन्टिना फाइनलसम्म पुगेको थियो। फाइनलमा तत्कालीन पश्चिम जर्मनीबाट पराजित भयो।
सन् १९९१ मा लागुपदार्थ सेवन गरेको पुष्टि भएपछि उनलाई १५ महिना प्रतिबन्ध लगाइएको थियो। उनले सन् १९९७ मा व्यावसायिक फुटबलबाट संन्यास लिएका थिए। त्यति बेला उनी ३७ वर्षका थिए।
सन् २००८ मा उनलाई अर्जेन्टिना फुटबल टिमको प्रशिक्षक नियुक्त गरिएको थियो। उनको प्रशिक्षणमा २०१० को विश्वकप मैदानमा ओर्लिएको अर्जेन्टिना क्वार्टर फाइनलमा जर्मनीबाट पराजित भयो।
