चुनाव इतिहासमै सुरक्षित रहेको वक्तब्य जारी गर्ने उच्च सरकारी अधिकारी पनि अन्ततः ट्रम्पबाट निष्काशित
प्रकाशित मिति : मंसिर २, २०७७ मंगलबार
राष्ट्रपति चुनाव अमेरिकी इतिहासमा नै सबैभन्दा सुरक्षित रहेको वक्तब्य जारी गर्ने डिपार्टमेन्ट अफ होमल्याण्ड सेक्युरिटीका उच्च सरकारी अधिकारी क्रिस्टोफर क्रेब्सलाई पनि डोनाल्ड ट्रम्पले निष्काशन गरेका छन् । क्रेब्ससहित अमेरिकी सरकारको डिपार्टमेन्ट अफ होमल्याण्ड सेक्युरिटीका उच्च अधिकारीहरु संलग्न समितिले यसपटकको राष्ट्रपति चुनाव अमेरिकी इतिहासमा नै सबैभन्दा सुरक्षित रहेको निष्कर्ष सार्वजनिक गरेको थियो ।
सरकारको साइबरसेक्युरिटी एण्ड इन्फास्ट्रक्चर सेक्युरिटी एजेन्सी सिसाले यस्तो निष्कर्ष निकालेको थियो । ह्वाइट हाउसलाई आक्रोशित पार्नेगरी चुनाव इतिहासमा नै सबैभन्दा सुरक्षित रहेको निष्कर्ष सहितको वक्तब्य जारी गर्ने होमल्याण्ड सेक्युरिटी अन्तरगतको कमिटि सिसाका निर्देशक क्रिस्टोफर क्रेब्सले आफू निष्काशन हुनसक्ने बताएका थिए । त्यसको एकसाता नबित्दै ट्रम्पले उनलाई निष्काशन गरिएको घोषणा गरेका छन् ।
केब्सको वक्तब्य एकदमै गलत भएको र मतदान गर्ने मेसिनले ट्रम्पका भोटहरु बाइडेनमा बदलेको ट्रम्पले आरोप लगाएका छन् । त्यसैले साइबरसेक्युरिटी एण्ड इन्फास्ट्रक्चर सेक्युरिटी एजेन्सी सिसाका निर्देशक केब्सलाई तुरुन्तै निष्काशन गरिएको ट्रम्पको भनाई छ ।
…votes from Trump to Biden, late voting, and many more. Therefore, effective immediately, Chris Krebs has been terminated as Director of the Cybersecurity and Infrastructure Security Agency.
— Donald J. Trump (@realDonaldTrump) November 18, 2020
ह्वाइटहाउसले सिसाका साइबरसेक्युरिटी सहायक निर्देशक ब्रायन वेयरलाई गत बिहिबार नै राजिनामा दिन लगाइएको थियो । डोनाल्ड ट्रम्पमा चुनावमा ब्यापक धाँधली भएको आरोप लगाइरहँदा सरकारका उच्च समितिहरुले वक्तब्य जारी गरेर प्रणालीमा कुनै मतहरु डिलिट भएको र हराएको कुनै प्रमाण नभएको बताएका थिए । त्यस्तै भोटहरु अदलबदल गरिएको वा कुनै तरिकाबाट साटफेर गरिएको कुनै प्रमाण नभएको पनि उनीहरुको भनाई थियो ।
मतदान प्रणाली पूर्व परीक्षणबाट सुरक्षित बनाइएको समेत वक्तब्यमा जनाइएको थियो । अहिले अमेरिकाभरका निर्वाचन अधिकारीहरुले चुनावको अन्तिम नतिजा सार्वजनिक गर्नु अगाडि सबै चुनावी प्रकृया पुनरावलोकन र पुन परीक्षण गरिरहेको सिसाको वक्तब्यमा जनाइएको थियो ।
