राष्ट्रपति भएपछि ५० हजारसम्मको विद्यार्थी ऋण मिनाहा गर्न बाइडेनलाई शुमरको आग्रह


प्रकाशित मिति : मंसिर २, २०७७ मंगलबार

सिनेटमा डेमोक्रेटिक नेता चक शुमरले नवनिर्वाचित राष्ट्रपति जो बाइडेनलाई राष्ट्रपतिको पदभार सम्हालेपछि कार्यकारी आदेशमार्फत ५० हजार डलरसम्मको विद्यार्थी ऋण मिनाहा गर्न आग्रह गरेका छन् । विद्यार्थी ऋण मिनाहा कार्यकालको सुरुको १ सय दिनको प्रमुख एजेण्डा हुनुपर्ने चक शुमरको भनाई छ ।

बाइडेनले तत्कालै हरेक विद्यार्थीको ५० हजार डलरसम्मको ऋण मिनाहाका लागि कदम चाल्नुपर्ने न्युयोर्कका डेमोक्रेटिक सिनेटर शुमरले बताएका हुन् । बाइडेनले यसअगाडि कोरोनाभाइरस राहत प्याकेज अन्तरगत १० हजार डलरसम्मको विद्यार्थी ऋण मिनाहाको आब्हान गर्दै आएका थिए ।

आफूले एलिजाबेथ वारेनसँग मिलेर हरेक विद्यार्थीको ५० हजार डलरसम्मको ऋण मिनाहाको प्रस्ताव ल्याएको र बाइडेनले यो कदम कार्यकारी आदेशमार्फत नै चाल्नेमा आफू विश्वस्त रहेको शुमरले एक अन्तरवार्तामा बताए । तिर्न बाँकी विद्यार्थी ऋण गत दशकमा दोब्बर भएको छ भने अहिलेसम्म झण्डै १ दशमलव ७ ट्रिलियन डलर विद्यार्थी ऋण विद्यार्थीहरुले तिर्न बाँकी रहेको छ ।

हरेक ६ जनामध्ये एकजना बयस्कले अमेरिकको संघीय सरकारलाई विद्यार्थी ऋण तिर्न बाँकी रहेको छ । जुन संघीय सरकारले जनतालाई दिएको ठूलोमध्येको एउटा ऋण हो । बाइडेनले शुमरको प्रस्ताव अनुशार ऋण मिनाहाका लागि कार्यकारी आदेश जारी गरेमा ७५ प्रतिशत भन्दा बढीको ऋण पूर्णरुपमा र ९५ प्रतिशतभन्दा बढीको ऋण आंशिकरुपमा मिनाहा हुनेछ ।

कार्यकालको सुरुको एकसय दिनमा बाइडेनले लेबर युनियनलाई बलियो बनाउने, जलवायु सम्बन्धि एजेण्डाहरु स्वीकार गर्ने र जातीय विभेदयुक्त अन्यायबिरुद्ध कदमहरु चाल्नुपर्ने शुमरको सुझाव रहेको छ । बाइडेनले सुरुको एकसयदिनमा अध्यागमन लगायतका विभिन्न कार्यकारी आदेशहरु जारी गर्ने अपेक्षा गरिएको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com