अब अमेजनले अमेरिकामा घरमै निशुल्क औषधी डेलिभर गर्ने
प्रकाशित मिति : मंसिर २, २०७७ मंगलबार
अब अमेजनले अमेरिकाका ४५ वटा राज्यमा घरमै निशुल्क औषधी डेलिभरी गर्ने भएको छ । जसका कारण बिरामीलाई औषधी लिनका लागि फार्मेसीमा धाउनुनपर्ने भएको छ । डाक्टरको प्रेस्क्रिप्सनमा बिरामीलाई दिनुपर्ने औषधी अमेजनले घरमै निशुल्क डेलिभरी गर्ने भएको हो ।
अमेजन प्राइम सदस्यहरुले २ दिनमा र अन्यले ५ दिनमा अमेजनबाट औषधी प्राप्त गर्नसक्नेछन् । प्राइम सदस्य नभएकाहरुले २ दिनमा औषधी प्राप्त गर्नका लागि भने ५ डलर ९९ सेन्टस तिर्नुपर्नेछ । अमेजनले अधिकांश इन्सुरेन्सहरु स्वीकार गर्ने भएकाले औषधी प्राप्त गर्नमा समस्या नहुने जनाइएको छ ।
डाक्टरहरुले अमेजन फार्मेसीमा सिधै अन्य फार्मेसीमा जस्तै प्रेस्क्रिप्सन पठाउन सक्नेछन् । वा बिरामीले सीभीएस वा वालग्रिन लगायत आफूले औषधी लिदै आएको फार्मेसीलाई अमेजन फार्मेसीमा प्रेस्क्रिप्सन पठाउनका लागि अनुरोध समेत गर्न सक्नेछन् ।
अहिलेका लागि यो सुविधा हवाई, इलिनोय, केन्टकी, लुजियाना र मिनेसोटाबाहेक अन्य सबै राज्यमा उपलब्ध हुने भएको छ । ४५ वटा राज्यमा १८ बर्षभन्दा माथिका व्यक्तिले यो सुविधा लिनसक्ने भएका छन् । इन्सुरेन्स नभएकाहरुका लागि अमेजन वचतको समेत अफर गर्नसक्ने जनाइएको छ । ग्राहकहरुले लचिलो वचत खाता वा स्वास्थ्य बचत खाताको प्रयोग गरेर औषधी प्राप्त गर्नसक्नेछन् ।
पहिलोपटक औषधी लिनेहरुलाई अमेजनले गर्भवती भए नभएको, जन्ममिति, जन्मने बेलामा तय गरिएको लिंग लगायतका विवरणहरु सोध्न सक्नेछन् । प्रेस्क्रिप्सन सुनिश्चित गर्नका लागि ती विवरणहरु कानुनको पालना गरेर मागिनेछ । ब्राण्ड नाम भएका औषधी र जेनेरिक औषधीको मिश्रण समेत अमेजनले अफर गर्ने जनाइएको छ ।
ग्राहकहरुले इन्सुलिन, रगतमा चिनीकोमात्रा नियन्त्रण गर्ने मेटफर्मिन, माइग्रेनको सुमाट्रिप्टन लगायतका औषधीहरु समेत प्राप्त गर्न सक्नेछन् । खासगरी नियमित रुपमा औषधी सेवन गनुपर्नेहरुका लागि अमेजनको यो सेवाबाट धेरै सुविधा हुने अपेक्षा गरिएको छ ।
हुलाकबाट वा अन्य डेलिभरी सेवाबाट औषधी मगाउने अमेरिकनहरुको संख्या बढ्दो रहेको अवस्थामा अमेजनको यो सेवा घोषणा गरेको हो । कोरोनाको महामारी कारण पनि अमेरिकनहरुले औषधीहरु डेलिभरी मगाइरहेका छन् ।