न्युयोर्कले हटायो क्वारेन्टीनको नियम लगाइएका राज्यको सुची, यस्तो छ नयाँ नियम
४७ वटा राज्यमा कोरोनाको संक्रमणको दर उच्च भएपछि न्युयोर्कले विभिन्न राज्यबाट न्युयोर्क आउनेमाथि लगाएको १४ दिने क्वारेन्टीनको नियम हटाएको छ । न्युयोर्कले विभिन्न राज्यबाट न्युयोर्क आएपछि क्वारेन्टीनमा बस्नुपर्ने भन्दै त्यस्ता राज्यको सुची प्रकाशित गर्दै आएकोमा उक्त सुची पनि हटाएको छ ।
नयाँ नियम अनुशार कुनै पनि राज्यबाट न्युयोर्क आउनेहरुले आउनुअगाडि र आइसकेपछि कोरोना परीक्षण गराउनुपर्ने भएको छ । अब न्युयोर्क आउनुअगाडि कुनै पनि व्यक्तिले कोरोना परीक्षण गराएर तीनदिनभित्रको रिपोर्ट न्युयोर्क आइसकेपछि बुझाउनुपर्नेछ ।
कुनै पनि राज्यबाट न्युयोर्क आउनेहरुले अनलाइनमा ट्राभलर हेल्थ फर्म भने अनिवार्य भर्नुपर्छ । उक्त फर्म नभर्नेहरुलाई २ हजार डलर जरिवाना र अदालतमा सुनुवाईका लागि बोलाउन सकिनेछ । विमानबाट आउनेहरुमात्र नभई पानीजहाज, रेल वा कारबाट आउनेहरुले पनि यो फर्म भर्न अनिवार्य छ ।
त्यसपछि न्युयोर्क आएपछि उनीहरु तीनदिनसम्म अनिवार्य क्वारेन्टीनमा बस्नुपर्नेछ । चौथो दिन न्युयोर्कमा कोरोना परीक्षण गराइसकेपछि कोरोना संक्रमण देखिएमा अनिवार्य १४ दिनसम्म क्वारेन्टीनमा बस्नुपर्नेछ । तर संक्रमण नदेखिएमा भने क्वारेन्टीनमा बस्न अनिवार्य छैन ।
न्युयोर्क आइसकेपछि जसजसले चौथोदिन कोरोना परीक्षण गराउँदैनन्, उनीहरु सबैजना १४ दिन अनिवार्य क्वारेन्टीनमा बस्नुपर्ने गभर्नर एन्ड्रयु कुमोले जनाएका छन् ।
२४ घण्टाभन्दा कम अवधि न्युयोर्कबाहिर जाने न्युयोर्कबासीहरुले पनि फर्केर आइसकेपछि आएको चौथो दिनमा अनिवार्य कोरोना परीक्षण गराउनुपर्नेछ । तर उनीहरु न्युयोर्कबाहिर जाँदा कोरोना परीक्षण गराउन आवश्यक छैन । साथै आइसकेपछि क्वारेन्टीनमा बस्नु पनि पर्दैन । उनीहरुले आइसकेपछि फर्म भने भर्नुपर्छ । तर न्युजर्सी, कनेक्टिकट र पेन्सिलभेनियाबाट फर्कनेहरुलाई यो नियम लागु हुनेछैन ।
अहिले न्युयोर्कमा सक्रमणदर जम्मा १ दशमलव ५ प्रतिशतको हाराहारीमा रहेको छ । जुन अमेरिकाभरकै राज्यहरुमा तेश्रो हो । न्युयोर्कले कोरोना संक्रमण कम गर्न जे गरिरहेको छ, त्यसका लागि गर्व गर्नुपर्ने र सचेतना कायम राख्नुपर्ने गभर्नर कुमोले बताए ।
अब राज्यहरुको सुची हटाइएपछि सबै राज्यका लागि एउटै नियम लागु हुनेछ । त्यस्तै न्युयोर्क आइसकेपछि अनलाइनमा ट्राभलर हेल्थ फर्म पनि भर्नुपर्नेछ ।
उक्त फर्म भर्न यहाँ क्लीक गर्नुहोला ।
