फाइजरको कोरोनाबिरुद्धको भ्याक्सिनको आम प्रयोगका लागि चुनावपछि अनुमति मागिने
फाइजरको कोरोनाबिरुद्धको भ्याक्सिनको आम प्रयोगका लागि चुनावपछि अनुमति मागिने उक्त कम्पनीका सीईओ अल्बर्ट बाउरियाले जनाएका छन् । उनले वेवसाइटमा प्रकाशित गरेको एउटा पत्रमा प्रभावकारिताका तथ्यांकहरु अक्टोबरको अन्त्यसम्ममा उपलब्ध हुनसक्ने अपेक्षा व्यक्त गरेका छन् ।
तथ्यांकहरु तयार हुनासाथ सुरुमा आपतकालिन प्रयोगका लागि अमेरिकाको खाद्य तथा औषधी प्रशासन एफडीएसमक्ष आवेदन दिइने छ । एफडीएले भ्याक्सिन सुरक्षित रहेको कम्तीमा दुईमहिनाको तथ्यांक प्राप्त गरेपछिमात्र आपतकालिन अनुमति दिने जनाएको छ । उक्त तथ्यांक अक्टोबरभित्रै आउने अपेक्षा गरिएको हो ।
अमेरिकन कम्पनी फाइजरले जर्मन कम्पनी बायोएनटेकसँग मिलेर कोरोनाबिरुद्धको भ्याक्सिन बनाएको छ । जसको अन्तिम चरणको क्लीनिकल परीक्षण भइरहेको छ । चुनावपछाडिमात्र आपतकालिन प्रयोगका लागि आवेदन दिने भएकाले अब चुनाव अगाडि भ्याक्सिन उपलब्ध हुने सम्भावना लगभग टरेको छ ।
अमेरिकी राष्ट्रपति डोनाल्ड ट्रम्पले चुनाव अगाडि नै भ्याक्सिन उपलब्ध हुने आशा व्यक्त गरेका थिए । तर फाइजरले नोभेम्बरको तेश्रोसातामात्र भ्याक्सिनको आम प्रयोगका लागि आवेदन दिनेछ । जसका कारण अमेरिकामा यसैबर्ष भ्याक्सिन उपलब्ध हुने सम्भावना बढेको छ ।
अमेरिकन कम्पनी मोडेर्नाको भ्याक्सिनको पनि तेश्रो चरणको क्लीनिकल परीक्षण चलिरहेको छ । अहिले विश्वमा १० वटा भ्याक्सिनहरु तेश्रो चरणको क्लीनिकल परीक्षणका क्रममा रहेका छन् । जसमध्ये बेलायतको आष्ट्राजेनेका र बेल्जियमको जोन्सन एण्ड जोन्सनको भ्याक्सिन लगाएका एकएकजना व्यक्ति बिरामी भएपछि भ्याक्सिन परीक्षणमा अवरोध आएको थियो ।
विश्वमा अहिले १७० वटाभन्दा धेरै कोरोनाबिरुद्धको भ्याक्सिनहरु पूर्व क्लीनिकल परीक्षणमा रहेका छन् । त्यस्तै १० वटा भ्याक्सिन पहिलो चरणको र १५ वटा भ्याक्सिन दोश्रो चरणको क्लीनिकल परीक्षणमा रहेका छन् ।
कोरोनाको भ्याक्सिन तीब्र गतिमा बनाउने प्रयास भइरहेको छ । जबकी पोलियोको भ्याक्सिन बन्न ७ बर्ष, दादुराको ९ बर्ष, ठेउलाको ३४ बर्ष लागेको थियो ।
