अहिलेसम्म अमेरिकाका १८ राज्यमा कोरोनाबाट मृत्यु हुने बालबालिकाको संख्या शुन्य
प्रकाशित मिति : भाद्र २५, २०७७ बिहीबार
महामारी सुरु भएयता अमेरिकामा कोरोना संक्रमित बालबालिका ५ लाख बढी भएको नयाँ तथ्यांकले देखाएको छ । अमेरिकन एकेडेमी अफ पेडियाट्रिकका अनुशार अमेरिकामा कुल संक्रमितहरुमध्ये ९ दशमलव ८ प्रतिशत बालबालिकाहरु रहेका छन् ।
हालसम्म अमेरिकामा ६५ लाख बढीमा कोरोना संक्रमण पुष्टी भइसकेको छ । अगस्त २० देखि सेप्टेम्बर ३ सम्मको दुईसातामा कोरोना संक्रमण हुने बालबालिकाहरुको संख्या १६ प्रतिशतले बढेको जनाइएको छ । नयाँ संक्रमित बालबालिकाहरु झण्डै ७० हजार रहेका छन् ।
सेप्टेम्बर ३ सम्मको तथ्यांक अनुशार अमेरिकाभर कोरोना संक्रमण पुष्टी हुने बालबालिकाहरु ५ लाख १३ हजार ४ सय १५ रहेका छन् । कोरोना संक्रमणका कारण मृत्यु हुने बालबालिकाहरुको संख्या भने अमेरिकामा १०३ रहेको छ । ४२ वटा राज्य र न्युयोर्क सिटीको तथ्यांक विश्लेषण गर्दा कुल मृत्युभएकामध्ये बालबालिकाहरु शुन्य दशमलव ३ प्रतिशत रहेका छन् ।
अन्य १८ वटा राज्यहरुमा भने कोरोना संक्रमणबाट मृत्यु हुने बालबालिकाहरुको संख्या शुन्य रहेको छ । कोरोना संक्रमणबाट बालबालिकाहरु सिकिस्तै हुने दर निकै कम रहेको छ ।
अमेरिकामा कोरोना संक्रमणबाट मृत्यु हुनेको कुल संख्या २ लाखको नजिक रहेको छ । अमेरिकापछि संक्रमित संख्या सबैभन्दा धेरै हुनेमा भारत दोश्रो छ । भारतमा कोरोना संक्रमणबाट ७५ हजार बढीको मृत्यु भइसकेको छ ।