क्वारेन्टीनको नियम नमान्नेले कनेक्टिकटमा पाए ३ हजार डलर जरिवानासहितको टिकट
प्रकाशित मिति : श्रावण २९, २०७७ बिहीबार
झण्डै ३ दर्जन राज्यहरुबाट कनेक्टिकट आउनेहरुले आफ्नो विवरणसहित फर्म भर्नुपर्ने र १४ दिन अनिवार्य क्वारेन्टीनमा बस्नुपर्ने भएपनि उक्त नियम नमान्ने दुईजनालाई तीनहजार डलर जरिवानासहितको टिकट जारी गरिएको छ । उनीहरुले लुजियाना र फ्लोरिडाबाट आएपछि आफ्नो विवरणसहितको फर्म भरेर अधिकारीहरुलाई बुझाएका थिएनन् ।
तीमध्ये एकजनाले १४ दिन सेल्फ क्वारेन्टीनमा बस्न समेत अस्वीकार गरेका थिए । सेल्फ क्वारेन्टीनमा बस्न अस्वीकार गर्नेबारे कसैले रिपोर्ट गरिदिएपछि उनका नाममा फर्म नभरेको र सेल्फ क्वारेन्टीनमा नबसेको गरी एकएकहजारका दुईवटा जरिवाना जारी गरिएको छ ।
गभर्नर नेड लामोन्टले आफूलाई यसरी जरिवाना जारी गर्न मन नभएपनि हामी यो नियमका बारेमा गम्भिर रहेका छौं । त्यसैले नियमको गम्भिरता बुझाउन पनि उल्लंघन गर्नेहरुलाई यसरी जरिवाना गर्नुपरेको छ ।
बुधबारसम्म ३४ राज्य र भूभागबाट न्युयोर्क, न्युजर्सी र कनेक्टिकटमा आउनेहरुले आफ्नो विवरणसहित फर्म भरेर बुझाउनुपर्छ भने सेल्फ क्वारेन्टीनमा बस्नुपर्छ । तीनवटा राज्यले फरकफरक जरिवाना रकमको नियम लागु गरेका छन् । न्युयोर्कमा जरिवाना रकम २ हजार डलर रहेको छ ।
कनेक्टिकटमा जरिवाना गरिएकाहरु हाटफोर्ड र वीन्डम काउन्टीमा बस्दै आएका थिए । उनीहरु कोरोना संक्रमित भए नभएकोबारे भने अहिलेसम्म केही पनि स्पष्ट छैन ।
यदि कुनै व्यक्तिले क्वारेन्टीनको नियम वा ट्राभल एड्भाईजरीको उल्लंघन गरेको पाउनुभएमा न्युयोर्कमा तपाईले तुरुन्तै ८३३ ७८९ ०४७० मा फोन गर्न सक्नुहुनेछ । तपाईले आफ्नो परिचय नखुलाइकन पनि यसको रिपोर्ट गर्न सक्नुहुनेछ ।
त्यस्तै तपाईले यो लिंकमा क्लिक गरेर पनि नियम उल्लंघन गर्नेहरुका बिरुद्ध जानकारी दिनसक्नुहुनेछ ।
कुनै बेला कोरोना महामारीको इपीसेन्टर रहेको न्युयोर्कमा अहिले परीक्षण गरिएकाहरुमध्ये एकप्रतिशतको हाराहारीमामात्र कोरोना संक्रमण देखिएको छ ।