सुरक्षा गार्डलाई कोरोनापछि सर्वोच्चका न्यायाधीश आइसोलेसनमा, टिचिङको आकस्मिक कक्ष सिल
प्रकाशित मिति : श्रावण २८, २०७७ बुधबार
![](https://i0.wp.com/www.khasokhas.com/wp-content/uploads/2019/09/supreme-court.jpg?fit=800%2C500&ssl=1)
सुरक्षा गार्डलाई कोरोना पोजेटिभ देखिएपछि सर्वोच्च अदालतका दुई न्यायाधीश ईश्वर खतिवडा र हरि फुयाल सेल्फ आइसोलेसनमा बसेका छन्। उनीहरूले सामाजिक सञ्जाल फेसबुकमार्फत् यसको जानकारी गराएका हुन्।
साउन २२ गते बिहीबारसम्म खतिवडाको सुरक्षामा खटिएका एक सुरक्षाकर्मीलाई बुधबार कोरोना देखिएपछि उनीहरू आफ्नै घरमा आइसोलेसनमा बसेका हुन्।
‘साउन २२ गते बिहीबारसम्म मेरो सुरक्षाका लागि खटिएका एक जना सुरक्षाकर्मीमा कोभिड– १९ पोजेटिभ देखियो। नमूना २६ गते दिएको र नतिजा आज करिब १: ३० बजे थाहा भयो। त्यसैले शंकाको अवस्था पैदा भएको छ। मैले आफूमा संक्रमणको लक्षण वा असहजता अहिलेसम्म महशुस गरेको छैन। आशा छ मलाई संक्रमण भएको छैन होला। तथापि सतर्कता र सावधानी अपनाउन आवश्यक ठानेर अहिले म आफ्नै निवासमा सामाजिक दुरी कायम राखेर बसेको छु,’ न्यायाधीश खतिवडाले फेसबुकमा लेखेका छन्।
यसैबीच टिचिङ अस्पताल महाराजगन्जको आकस्मिक कक्षमा कार्यरत २ जना चिकित्कलाई कोरोना भाइरस संक्रमण देखिएको छ।
२ चिकित्सक र ४ जना नर्समा कोरोना संक्रमण पुष्टि भएपछि बुधबार आकस्मिक कक्ष सिल गरिएको अस्पताल प्रशासनले जनाएको छ ।
६ जनामा संक्रमण पुष्टि भएपछि अस्पतालका अन्य डाक्टर तथा नर्सहरूको पीसीआर परीक्षण शुरू गरिएको अस्पतालका निर्देशक प्राध्यापक डाक्टर रोहितकुमार पोखरेलले जानकारी दिए।