सांसद यादवलाई कोरोना संक्रमण, संसद सचिवालयका ८ कर्मचारी आइसोलेसनमा
प्रकाशित मिति : श्रावण २२, २०७७ बिहीबार
जनता समाजवादी पार्टीका सांसद प्रदीप यादवलाई कोरोना संक्रमण भएपछि संसद सचिवालयका ८ कर्मचारी आइसोलेसनमा बसेका छन् । उनीहरुको वीर अस्पतालमा पीसीआर परीक्षण गरिएपनि नतिजा आइसकेको छैन ।
सांसदको सार्वजनिक लेखा समितिका सदस्य रहेका सांसद यादव सहितको संसदीय अनुगमन उपसमितिको टोली २ साता अघि सिन्धुली हुँदै सुदूरपश्चिमसम्म गएको थियो । अनुगमन समितिमा सांसद यादवसँगै अन्य २ सांसद मीना सुब्बा, प्रेम आलेमगर रहेका थिए ।
सांसद यादव चढेको गाडीका ३ जनालाई कोरोना संक्रमण भएको छ । जसमा यादवको पीएसओ र सवारी चालक रहेका छन् । उनीहरु अहिले उपचारका क्रममा रहेका छन् । उनीहरुको सम्पर्कमा रहेका अन्य दुई सांसदसहित लेखा समितिमा रहेका कर्मचारीको स्वाव संकलन भएको र नतिजा आउन बाँकी रहेको संघीय संसद सचिवालयका प्रवक्ता डा.रोजनाथ पाण्डेले जानकारी दिए ।