न्युयोर्कमा खोलिएको अस्थायी अस्पतालमा कोरोनाका ७९ बिरामीको उपचारमा ५२ मिलियन खर्च
न्युयोर्कको क्वीन्स कोरोना पार्कमा रहेको बेली जिन किङ नेशनल टेनिस सेन्टरमा कोरोनाका बिरामीको उपचारका लागि खोलिएको अस्थायी अस्पतालमा जम्मा ७९ जना बिरामी लिइएको र ५२ मिलियन खर्च भएको खुलासा भएको छ । अप्रिलको पहिलोसाता खोलिएको उक्त अस्पताल झण्डै एकमहिना खुला भएको र क्वीन्स हस्पिटल सेन्टरमा आएका जम्मा ३ जना बिरामीको उपचार गरिएको जनाइएको छ । जम्माजम्मी उक्त अस्पतालले ७९ जनालाई सेवा दिएको थियो ।
क्वीन्सका अस्पतालहरुले उक्त अस्थायी अस्पतालमा बिरामी ट्रान्सफर गर्न खोज्दा संचारमा समस्या भएको र ब्यूरोक्रेसीले नै रोकेको जनाइएको छ । न्युयोर्कले उक्त अस्पतालमा काम गर्ने डाक्टरलाई घण्टाको ७३२ डलरसम्म तिरेको थियो । उनीहरुले कोरोनाका बिरामीको उपचार गर्नुपर्नेमा कोरोना संक्रमणका लक्षण भएका र ज्वरोका बिरामीलाई समेत नलिएको खुलासा भएको छ ।
गम्भिर बिरामीहरुको उपचार गर्ने भनिएपनि जम्मा एउटा वा दुईवटामात्र भेन्टिलेटरसहित अस्पताल खोलिएको थियो । उक्त अस्पतालमा कार्यरत एकजना नर्सले आफूले दिनभर कुनै काम नपाएर फोनमा फेसबुक चलाएर बसेको र दिनको २ हजार डलर तलब पाएको न्युयोर्क टाइम्सलाई बताएकी छिन् । उनले आफूलाई त्यसका लागि हिनताबोध भएको समेत बताएकी छिन् ।
न्युयोर्कमा कोरोनाको महामारी फैलिंदा अस्पतालहरु भरिएका थिए । जाभिट सेन्टरमा बनाइएको अस्थायी अस्पताल र पानीजहाजमा बनाइएको अस्पतालमा समेत बिरामीहरुको उपचार गरिएको थियो । त्यहाँ प्राइभेट मेडिकल सेन्टरबाट पठाइएका बिरामीहरुको पनि उपचार गरिएको थियो । तर न्युयोर्क सिटीले बनाएको एउटामात्र इमर्जेन्सी अस्पताल बेली जिन किङमा भने लज्जाजनक अवस्था देखियो । यो अस्पताल मे १३ मा बन्द गरिसकिएको छ ।
जाभिट सेन्टरमा बनाइएको अस्थायी अस्पतालमा समेत १४ सय भन्दा बढी विरामीहरुको उपचार गरिएको थियो । यद्यपी त्यहाँ पब्लिक अस्पतालबाट भने जम्मा ३ सय बिरामीहरुलाई ट्रान्सफर गरिएको थियो । सेन्ट्रल पार्कमा पाल टाँगेर बनाएको अस्पतालमा समेत माउन्ट साइनाईबाट ट्रान्सफर गरिएका ३ सय बढीको उपचार गरिएको थियो ।
