काठमाडाैं उपत्यकामा कोरोना संक्रमितको संख्या बढ्दो,नेपालमा संक्रमित संख्या १३ हजार ५६४
प्रकाशित मिति : असार १६, २०७७ मंगलबार
नेपालमा कोरोना भाइरस सङ्क्रमितको सङ्ख्या मंगलबार १३ हजार ५६४ पुगेको छ । स्वास्थ्य तथा जनसङ्ख्या मन्त्रालयका प्रवक्ता प्रा.डा.जागेश्वर गौतमले पछिल्लो २४ घण्टामा देशभर थप ३१६ जनामा कोरोना सङ्क्रमित थपिएको जानकारी दिनुभयो ।
मंगलबार देशभर थप ६० डिस्चार्ज भएका छन् । याेसँगै निकाे हुने तीन हजार १९८ पुगेकाे छ । डिस्चार्ज हुनेमा ९ महिला र पुरूष ५१ जना भएका छन्। अहिलेसम्म २७७ महिला र २९१७ पुरूष निकाे भएका छन् ।
काठमाडौँ जिल्लामा ७ पुरुष र महिला ५ सहित १२ जना, ललितपुरमा एक पुरूष र भक्तपुरमा एक महिलालाई कोरोना भाइरस पुष्टि भएको छ । यसरी उपत्यकामा मगंलबार अहिलेसम्मकै बढी सङ्क्रमित थपिएका छन् ।
नेपालमा कोरोना भाइरस रोकथामको लागि भएका प्रयास विश्वको लागि उदाहरणीय भएको छ । पत्रकार सम्मेलनमा प्राडा गौतमले नेपालमा कोरोना भाइरसबाट हुने मृत्युदर अत्यन्त कम भएको बताउनुभयो । अमेरिका, बेलायत, इटाली, चीनलगायतको देशको तुलनामा अत्यन्त कम रहेको जानकारी दिनुभयो ।
प्रवक्ताका अनुसार दक्षिण एसियाली मुलकहरुमा बंगलादेश, माल्दिभ्स, अफगानिस्तान र पाकिस्तानको तुलनामा प्रति दशलाख भएको सङ्क्रमण कम रहेको छ । नेपालमा दक्षिण एसियामा अफगानिस्तान, भारतलगायतका देशहरु भन्दा पीसीआर परीक्षण धेरै गरिएको उहाँले जानकारी दिनुभयो । उहाँका अनुसार पछिल्लो २४ घण्टामा नेपालमा चारहजार ७११ वटा पीसीआर परीक्षण भएको छ ।