कालापानी क्षेत्र समेटेर नक्सा जारी गर्दा भारतले मलाई प्रधानमन्त्रीबाट हटाउन खोज्यो: ओली
प्रकाशित मिति : असार १४, २०७७ आईतबार
![](https://i0.wp.com/www.khasokhas.com/wp-content/uploads/2020/05/828048290kpsharmaoli-kp-sharma-oli-pmoli-nepal-pmnepal-scaled.jpeg?fit=2560%2C1323&ssl=1)
प्रधानमन्त्री केपी शर्मा ओलीले लिम्पियाधुरा, महाकाली र लिपुलेकलाई समेटेर नक्सा जारी गरेपछि गरेकै कारण भारतले आफुलाई प्रधानमन्त्रीबाट हटाउन कोसिस गरिरहेको बताएका छन् । प्रधानमन्त्री निवास बालुवाटारमा भएको मदन भण्डारी जन्मजयन्ती कार्यक्रमलाई सम्बोधन गर्दै ओलीले आफूलाई हटाउनका लागि नयाँ दिल्ली र काठमाडौंमा षड्यन्त्र भएको बताउँदै प्रधानमन्त्रीबाट हटाउँछु भन्ने नसोच्न चेतावनी दिएका छन् ।
चीनसँग पारवहनको सम्झौता गर्दा यसअघि आफ्नो नेतृत्वको सरकार ढलेको बताउँदै ओलीले भने, ‘अहिले हाम्रो बहुमत छ, आफ्नो भूमिमा दाबी गरेर नक्सा छाप्ने, यस्तो अपराध गर्ने केपी ओलीलाई हटाउँछु भन्ने कसैले नसोचे हुन्छ ।’ प्रधानमन्त्री केपी शर्मा ओलीले आफू पदमा, सरकारमा बसिरहन मन नभए पनि राष्ट्रका लागि अनिवार्य भएको बताए । उनले भने, ‘मलाई प्रधानमन्त्रीबाट हटाउन प्रयास गर्नेलाई गर्न दिऔँ । यदी अहिले म हट्ने हो भने नेपालका पक्षमा कोही पनि बोल्ने मान्छे हुन्न । आफ्ना लागि होइन देशका लागि आवश्यक भएकाले बसेको हुँ ।’