११ दिनमा कोरोनाको उपचार गर्ने रेम्डिसिभियरको उत्साहजनक नतिजा सार्वजनिक
अमेरिकामा कोरानोबिरुद्धको उपचारका लागि प्रयोग गरिएको औषधी रेम्डिसिभियरको परीक्षणको नतिजा आएको छ । उक्त एन्टीभाइरल औषधी सुरुमा इबोलाको उपचारका लागि बनाइएको थियो तर अहिले उक्त औषधी कोरोनाबिरुद्धको उपचारमा प्रभावकारी देखिएको छ । न्यू इंग्ल्याण्ड जर्नल अफ मेडिसिनमा प्रकाशित रिपोर्ट अनुशार यो औषधीले कोरोनो संक्रमितहरुको उपचार छोटो समयमा गर्न सफल भएको छ ।
रिपोर्ट हेर्न यहाँ क्लिक गर्नुहोला ।
अमेरिकाको खाद्य तथा औषधी प्रशासन एफडीएले अप्रिलको अन्तिम साता नै कोरोना भाइरसबिरुद्धको उपचारकालागि रेम्डिसिभियर नामको औषधी प्रयोगलाई आपतकालिन अनुमति प्रदान गरेको थियो । क्लीनिकल अध्ययनको प्रारम्भिक परिणामले यो औषधीको प्रयोगबाट कोरोना भाइरस संक्रमणका बिरामीहरु शीघ्र निको भएको देखाएपछि उक्त एन्टीभाइरल औषधीको प्रयोगका लागि अनुमति दिइएको थियो । कोरोनाबिरुद्ध स्पष्ट सकारात्मक परिणाम दिएको यो पहिलो औषधी बनेको छ ।
यौ औषधीको सेवन गरेकाहरुलाई ११ दिनमा नै निको भएको पुष्टी भएको छ । परीक्षण अमेरिका, युरोप र एसियाका विभिन्न ६० ठाउँमा १०५९ जना कोरोनाका बिरामीहरुमा गरिएको थियो । ५३८ जना बिरामीहरुलाई औषधीको १० दिनको कोर्स दिइएको थियो । अरु ५२१ जना बिरामीहरुलाई पनि उक्त औषधी दिइएको थियो । ति बिरामीहरुको दैनिक अनुगमन गरेर लक्षणहरु कम भएको नभएको वा कुनै साइड इफेक्ट भए नभएको निरीक्षण गरिएको थियो ।
अमेरिकामा एफडीएको स्वीकृतिपछि कोभिड १९ का अस्पतालमा भर्ना गरिएका बिरामीहरुका लागि औषधी उपलब्ध गराइएको छ । अप्रिलको अन्तिम साता नेशनल एन्स्टीच्युट अफ हेल्थको क्लीनिकल परीक्षणबाट उत्साहजनक परिणाम आएको निष्कर्ष निकालिएको दुईदिनपछि एफडीएले औषधीको प्रयोगको अनुमति दिएको थियो ।
एफडीएले यसभन्दा अगाडि मलेरियाको औषधी क्लोरोक्वीन र हाइड्रोक्सीक्लोरोक्वीनलाई आपतकालिन रुपमा कोरोनाको उपचारका लागि प्रयोग गर्न स्वीकृति प्रदान गरेको थियो । तर पछि यो औषधीको प्रयोगबाट बिरामीको मुटुको चालको समस्यादेखिएपछि उक्त औषधी प्रयोगबिरुद्ध चेतावनी जारी गरिएको थियो । हाइड्रोक्सीक्लोरोक्वीनको प्रयोगबाट मृत्युदर बढेको समेत अध्ययनले देखाएको थियो ।
रेम्डिसिभियर नामको औषधीको प्रयोगबाट कोरोना संक्रमित बिरामीहरु ११ दिनमा नै निको भएको नेशनल एन्स्टीच्युट अफ एलर्जी एण्ड इन्फेक्सियस डिजिजको अध्ययनबाट पत्ता लागेको हो । यो औषधी प्रयोग नगरेकाहरु १५ दिनमा निको भएपनि यो औषधी प्रयोग गरेकाहरु ११ दिनमा निको भएका छन् ।
कम्तीमा यो औषधीको ५ दिनको डोज प्रयोग गरिएका ५० प्रतिशत बिरामीमा उल्लेख्य सुधार आएको औषधी उत्पादनकर्ता कम्पनीले यसअगाडिको रिपोर्टमा समेत जनाएको थियो । यस अगाडि यो औषधीको क्लीनिकल परिक्षण कोरोनाबाट अत्यन्तै सिकिस्त भएका ३९७ बिरामीहरुमा गरिएको थियो ।
यो औषधीको ५ वा १० दिनको डोज तयार पारिने जनाइएको छ । कम्पनीले यो औषधीको उत्पादनका लागि गरिएको अध्ययनमा ५० मिलियन डलर खर्च गरिसकेको छ । कम्पनीले मे महिनाको अन्त्यसम्ममा डेढलाखभन्दा बढी १० दिने डोजका औषधीहरु उत्पादन गर्ने जनाएको छ ।
अहिलेका लागि भने यो औषधी आईभीमार्फत अस्पतालमा भर्ना भएका बिरामीलाईमात्र दिन सकिन्छ । कोरोनाको संक्रमण पुष्टी भइसकेकाहरुलाईमात्र यो औषधी चलाउन अनुमति दिइएको छ ।
बेलायतमा बन्दै गरेको कोरोनाबिरुद्धको भ्याक्सिनको पहिलो ३ सय मिलियन डोज अमेरिकाले पाउने
यसैबीच बेलायतमा बन्दै गरेको कोरोनाबिरुद्धको भ्याक्सिनको ३ सय मिलियन डोज अमेरिकाले लिने भएको छ । ईग्ल्याण्डमा रहेको आष्ट्राजेनेका कम्पनीले उत्पादन गर्ने पहिलो १ बिलियनमध्ये झण्डै एकतिहाई उत्पादन अमेरिकाले लिने भएको छ ।
यो भ्याक्सिन अझै पनि परीक्षणकै क्रममा रहेको छ । अमेरिकी राष्ट्रपति डोनाल्ड ट्रम्पले भ्याक्सिनको माग गरेपछि युएस डिपार्टमेन्ट अफ हेल्थले तीब्र गतिमा भ्याक्सिन उत्पादनका लागि आष्ट्राजेनेका कम्पनीलाई १ दशमलव २ बिलियन डलर दिने सहमति जनाएको छ । यो कम्पनीले सन् २०२१ मा भ्याक्सिन सर्वत्र उपलब्ध गराउनेगरी काम गरिरहेको जनाइएको छ ।
एजीडी १२२२ नामबाट चिनिने यो भ्याक्सिन युनिभर्सिटी अफ अक्सफोर्डले विकाश गरेको हो भने यसको लाइसेन्स बेलायती औषधी कम्पनी आष्ट्राजेनेकासँग रहेको छ । कम्पनीसँगको भ्याक्सिनको तेश्रो चरणको परीक्षण अमेरिकामा ३० हजार जनामा गर्न दिनका लागि अमेरिकाले सहमति जनाएको छ ।
यो कम्पनी क्याम्ब्रिजमा रहेको छ भने यो अहिलेसम्म ४ सय मिलियन डोजका लागि भ्याक्सिन बुक भइसकेको कम्पनीले जनाएको छ । भ्याक्सिनको पहिलो डेलिभरी आगामी सेप्टेम्बरमा हुने अपेक्षा गरिएको छ ।
यो भ्याक्सिनको एकसय मिलियन डोज बेलायतमा प्रदान गर्ने सहमति भइसकेको छ । जसमध्ये ३० मिलियन डोज सेप्टेम्बरमा प्रदान गरिने अपेक्षा गरिएको छ । बेलायती मन्त्रीहरुले यो भ्याक्सिनमा पहिलो पहुच बेलायतमा हुने प्रतिबद्धता जनाएका छन् ।
अमेरिकी सरकारले भ्याक्सिन उत्पादन गर्दै गरेका अन्य कम्पनीहरु जोन्सन एण्ड जोन्सन, मोडेर्ना र सानोफीसँग पनि सहमति कायम गरिसकेको छ । यसलाई कतिपयले धनी देशहरुलेमात्र सबैभन्दा पहिले आफ्ना नागरिकको संरक्षण गर्न पाउने भन्दै डर समेत व्यक्त गरेका छन् ।
भ्याक्सिन उत्पादन कम्पनी सानोफीका प्रमुखले अमेरिकामा उत्पादन भइरहेको भ्याक्सिनको पहिलो डोज अमेरिकी बिरामीहरुलाई नै दिइने बताउँदा फ्रान्सको सरकार रिसाएको थियो । अमेरिकाले शोधका लागि आर्थिक रुपमा सघाएकाले भ्याक्सिनको पहिलो डोज अमेरिकालाई नै दिने उनले बताएका थिए ।
आष्ट्राजेनेकाले बनाइरहेको एजीडी १२२२ भ्याक्सिनको पहिलो चरणको दोश्रो क्लिनिकल परीक्षण गतमहिना १८ देखि ५५ बर्षसम्मका एकहजारबढी स्वयंसेवकहरुमा गरिएको थियो । यो परीक्षणको तथ्यांक छिट्टै सार्वजनिक हुने अपेक्षा गरिएको छ ।
अहिलेसम्म विश्वमा कोरोनाभाइरसबिरुद्धको भ्याक्सिन वा औषधी उपलब्ध छैन । सरकार, औषधीनिर्माता र शोधकर्ताहरुले एकसयभन्दा बढी कार्यक्रममा काम गरिरहेका छन् । भ्याक्सिन तयार हुने १२ महिनादेखि १८ महिनासम्म लाग्नसक्ने बताइदै आएको छ ।
अमेरिकामा मोडेर्नाले पनि बनाउँदैछ भ्याक्सिन, सरकारको ५ सय मिलियन डलर लगानी
अमेरिकामा कोभिड १९ बिरुद्धको एउटा भ्याक्सिन टेस्टको प्रारम्भिक नतिजा निकै उत्साहजनक आइसकेका छ । अमेरिकाको बायोटेक कम्पनी मोडेर्नाले पहिलो क्लिनिकल टेस्टको नतिजा निकै उत्साहजनक आएको गतसाता बताएको थियो ।
उक्त कम्पनीले पहिलो चरणमा केही स्वयंसेवकहरुमा भ्याक्सिनको परीक्षण गरेको थियो । भ्याक्सिन दिइएका आठजनामा भ्याक्सिनले इम्युन रेस्पोन्स उत्पादन गरेको छ । एमआरएनए १२७३ नामको उक्त भ्याक्सिनले इम्युनको विकाश गरेको पहिलो चरणको डाटामा देखिएको छ ।
मोडेर्नाका प्रमुख मेडिकल अफिसर टाल ज्याक्सले यो परीक्षणबाट कोभिड १९ रोगलाई निरोध गर्नसक्ने सम्भावना उजागर भएको बताएका छन् । अमेरिकी राष्ट्रपति डोनाल्ड ट्रम्पले उक्त समाचारको स्वागत गरेका छन् ।
मोडेर्ना कम्पनी झण्डै ९ बर्षअगाडि स्थापना गरिएको कम्पनी हो । कम्पनीले यो भ्याक्सिन सुरक्षीत र राम्ररी सहनसकिने खालको रहेको बताएको छ । भ्याक्सिन लगाउँदा सामान्य रुपमा चसक्कमात्र हुने र लगाएको ठाउमा अलिअलि रातो हुने जनाइएको छ ।
यसबारे मोडेर्ना कम्पनीको वक्तब्यको पूर्णपाठ ।
अमेरिकी सरकारले मोडेर्नाको भ्याक्सिन क्यान्डिडेड विकाशका लागि झण्डै ५ सय मिलियन डलर लगानी गरेको छ । यो भ्याक्सिन एन्थोनी फौजी नेतृत्वको नेशनल इन्स्टीच्युट अफ एलर्जी एण्ड इन्फेक्सियस डिजिजसँगको सहकार्यमा विकाश गरिदै छ ।
अहिलेसम्म १८ देखि ५५ बर्षसम्मका १५ बिरामीहरुलाई भ्याक्सिनका तीन भिन्न डोजहरु दिइएको छ । प्रारम्भिक नतिजा उत्साहजनक रहेपनि पूरै नतिजा भने आएको छैन ।
दोश्रो चरणमा अगाडि बढ्नका लागि मोडेर्नाले एफडीएबाट स्वीकृतिको ग्रिन सिग्नल पाइसकेको छ । जुन ६ सय जनामा परीक्षण गरिनेछ । तेश्रो चरणको परीक्षण निकै बृहत हुनेछ भने यो परीक्षण जुलाईमा सुरु हुनेछ ।
अमेरिकी राष्ट्रपति डोनाल्ड ट्रम्पले आगामी जनवरीसम्म आफूले ३ सय मिलियन भ्याक्सिनको डोज चाहेको बताएका छन् । ट्रम्प प्रशासनले त्यसका लागि मोडेर्ना, जोन्सन एण्ड जोन्सन र फ्रान्सको सानोफीलाई फण्ड उपलब्ध गराएको छ ।
