अमेरिकी करदातालाई १२ सय डलर दिने प्याकेज अगाडि बढाउनमा डेमोक्रेटिक सिनेटरबाट अवरोध
प्रकाशित मिति : चैत्र १०, २०७६ सोमबार
हरेक अमेरिकी करदातालाई कोराना भाइरसबाट उत्पन्न आर्थिक संकटसँग जुध्नका लागि १२ सय अमेरिकी डलरको चेक प्रदान गर्ने बिललाई डेमोक्रेटिक सिनेटरहरुले पारित हुनबाट रोकेका छन् । आज सिनेटमा भएको मतदानमा ४६ जना डेमोक्रेटिक सिनेटरहरुले विपक्षमा मतदान गरेका छन् ।
पक्षमा मतदान गर्ने रिपब्लिकन सिनेटरहरुको संख्या ४९ रहेको छ । एकजना डेमोक्रेटिक सिनेटरलेमात्र विल अगाडि बढाउने पक्षमा मतदान गरेका छन् । दुईदलीय सहमतिमा पुग्न प्रयास भइरहेको बेलामा मिच म्याक्कोनेलले मनोमानी ढंगले बिल सदनमा ल्याएको भन्दै डेमोक्रेटिक सिनेटरहरुले विपक्षमा मतदान गरेका हुन् ।
आइतबारपनि डेमोक्रेटिक सिनेटरहरुले राहत प्याकेजसहितको यो बिल पारित हुनबाट रोकेका थिए । राहत प्याकेजलाई अगाडि बढ्न नदिएकोमा रिपब्लिकन सिनेटरहरुले आक्रोश व्यक्त गरेका छन् । सिनेटमा डेमोक्रेटिक नेता चक शुमरले आफूहरु सहमतिको असाध्यै नजिक पुगेको बताएका छन् । सहमति भएपनि अन्तिम मतदान हुने उनले बताएका छन् ।
सिनेटमा ५३ जना रिपब्लिकन सिनेटरहरु रहेपनि एकजना सिनेटरमा कोरोना संक्रमण पुष्टी भएको छ भने दुईजना सिनेटरहरु सेल्फ क्वारेन्टाइनमा छन् । बिललाई अगाडि बढाउन कम्तीमा ६० भोटको आवश्यकता पर्छ ।
कोराना भाइरसका कारण उत्पन्न आर्थिक समस्यासँग जुध्न अमेरिकामा जनही १२ सय डलर दिने प्रस्तावसहित बिल सिनेटमा पेश गरिएपछि यसबारे चर्चा परिचर्चा सुरु भएको छ । खासगरी यो रकम कुन इमिग्रेशन स्टाटस भएकाले पाउलान् भन्ने जिज्ञासा देखिएको छ । सिनेटका बहुमतप्राप्त दलका नेता मिच म्याक्कोनेलले कोरोना भाइरसको संक्रमणबिरुद्ध लड्न उक्त आर्थिक प्रस्ताव पेश गरेका हुन् ।
उक्त बिलमा निश्चित भन्दा कम आम्दानी भएकाहरुलाई जनही १२ सय अमेरिकी डलर दिने प्रस्ताव समेटिएको छ । यो रकम अमेरिकाका करदाताहरुले प्राप्त गर्ने भनिएको छ । बिलमा कुनै अध्यागमन स्टाटसको बारेमा उल्लेख गरिएको छैन । यसर्थ यो रकम अमेरिकामा कर फाइल गर्ने जुनसुकै स्टाटसको व्यक्तिले प्राप्त गर्ने देखिएको छ ।
बार्षिक ७५ हजार भन्दा कम आम्दानी हुने एकजनालाई १२ सय डलर प्रदान गरिने छ । यदि दम्पत्तिले ज्वाइन्ट ट्याक्स फाइल गरेका छन् र उनीहरुको आम्दानी बार्षिक १ लाख ५० हजार भन्दा कम रहेको छ भने उनीहरुले २४ सय डलर प्राप्त गर्नेछन् ।
बिलको पूर्ण पाठ यहाँ उपलब्ध छ ।
७५ हजारभन्दा बढी आम्दानी हुनेहरुका सन्दर्भमा हरेक एकसय डलर बढी आम्दानीमा ५ डलर घटाउँदै लगिनेछ । ९९ हजारसम्म आम्दानी हुनेलेमात्र रकम प्राप्त गर्नेछन् जु अनुशार कसैको ८० हजार आम्दानी छ भने उसले ९५० प्राप्त गर्नेछ भने ९० हजार आम्दानी हुनेले ४५० प्राप्त गर्नेछ ।
त्यस्तै विवाहित जोडीको सन्दर्भमा १ लाख ५० हजार भन्दा धेरै बार्षिक आम्दानी हुनेले हरेक १ सय डलरमा ५ डलर घटाउँदै हिसाब गरेर रकम दिइनेछ । अर्थात् यदि कसैको १ लाख ६० हजार बार्षिक आम्दानी छ भने उनीहरुले १९ सय डलर पाउनेछन् । अधिकतम १ लाख ९८ हजार आम्दानी हुने जोडीलेमात्र रकम पाउनेछन् ।
परिवारका अन्य सदस्यको सन्दर्भमा हरेक बच्चाका लागि ५ सय डलर दिइनेछ । अर्थात् १ लाख ५० हजार भन्दा कम आम्दानी भएका दम्पत्तिका २ बच्चा छन् भने यो परिवारले कुल ३४ सय डलर प्राप्त गर्नेछ ।
कम करको उत्तरदायीत्व भएका वा नभएकाहरु तर सामाजिक सुरक्षा निवृत्तिभरण आम्दानी, भेट्रानलाई दिइने पेन्सन वा क्षतिपूर्ति वापत कम्तीमा २५ सय योग्य आम्दानी भएकाहरुले एकजनाले ६ सय र जोडीले १२ सय अमेरिकी डलर प्राप्त गर्नेछन् ।
यदि तपाई अमेरिकाको करदाता हुनुहुन्न भने तपाईले यो रकम प्राप्त गर्न सक्नुहुनेछैन ।
अमेरिकामा यसरी चेक पठाउने गरिएको यो नै पहिलोपटक भने होइन । सन् २००८ को आर्थिक मन्दीका बेलामा अमेरिकी सरकारले हरेक बयस्कलाई ३ सय देखि ६ सय डलरसम्मको चेक पठाएको थियो । बालबालिकालाई ३ सय डलरको चेक पठाइएको थियो । त्यस्तै सन् २००१ मा पनि अधिकांश अमेरिकनहरुले ३ सय डलरको चेक प्राप्त गरेका थिए ।
गत आर्थिक मन्दीको बेलामा अमेरिकामा ट्याक्स फाइल गरेका र मिलेनियरबाहेकका प्राय सबैलाई त्यतो चेक पठाइएको थियो । सोसल सेक्युरिटी भत्ता पाइरहेकाहरुले समेत त्यस्तो चेक प्राप्त गरेका थिए । यसपटक पनि सोही विधि अपनाउन खोजिएको छ ।
विगतमा उक्त रकम हुलाकबाट वा बैंक एकाउन्टमा सिधै पठाइएको थियो । रकम २ सातामा पठाउने ह्वाइट हाउसको प्रस्ताव रहेपनि त्योभन्दा लामो समय लाग्नसक्ने जनाइएको छ । सन् २००८ मा रकम पठाउन झण्डै २ महिनाको समय लागेको थियो ।
आइआरएससँग धेरैजनाको डाइरेक्ट डिपोजिट विवरण भएकाले त्यही एकाउन्टमार्फत पठाउन सकिने जनाइएको छ । गतबर्षको ट्याक्स फाइलमा झण्डै ९० प्रतिशतले डाइरेक्ट डिपोजिटका लागि बैंक एकाउन्टहरु दिएका थिए ।