युरोपका २६ देशबाट अमेरिका आउनमा लगाइएको प्रतिबन्धको युरोपियन युनियनबाट निन्दा
प्रकाशित मिति : फाल्गुन २९, २०७६ बिहीबार
युरोपका २६ देशबाट अमेरिका आउनमा लगाइएको प्रतिबन्धको युरोपियन युनियनले निन्दा गरेको छ । अमेरिकी राष्ट्रपति डोनाल्ड ट्रम्पले शुक्रबार रातीदेखि लागु हुनेगरी युरोपमा २६ देशबाट अमेरिका आउनमा प्रतिबन्ध लगाएका छन् ।
राष्ट्रपति ट्रम्पले २६ देशमा विगत १४ दिनभित्र यात्रा गरेका अन्य देशका नागरिकहरुलाई पनि प्रतिबन्ध लगाएका छन् । तर यस्तो प्रतिबन्ध अमेरिकी नागरिक, ग्रिनकार्डवाहक, नजिकका परिवारका सदस्य लगायतलाई पनि लागु हुनेछैन ।
युरोपियन युनियले अमेरिकाले एकतर्फी रुपमा र कुनै सरसल्लाहविना लगाएको यात्रा प्रतिबन्धको युरोपियन काउन्सिल प्रेसिडेन्ट चाल्र्स काइकल र युरोपियन युरोपियन कमिशन प्रेसिडेन्ट उर्सुला भोन डेयर लेयनबाट जारी वक्तब्यमा जनाइएको छ । कोरोनाभाइरस कुनै महादेशको नभएर विश्वब्यापी समस्या भएकाले समाधानका लागि एकतर्फी होइन, समन्वयको आवश्यकता रहेको वक्तब्यमा जनाइएको छ ।
अमेरिकाले शेंगेन समुहभित्र पर्ने देशहरुलाई यस्तो प्रतिबन्ध लगाएको हो । यो प्रतिबन्ध बेलायतलाई भने लगाइएको छैन । ट्रम्पको प्रतिबन्धपछि युरोपबाट अमेरिका आउने उडानहरु प्रभावित भइसकेका छन् । हरेक दिन एटलान्टिक ओसनलाई पार गरेर युरोपबाट झण्डै ४ सय उडानहरु अमेरिका आउने गर्छन् ।
अष्ट्रिया, बेल्जियम, चेक रिपब्लिक, डेनमार्क, इस्टोनिया, फिनल्याण्ड, फ्रान्स, जर्मनी, ग्रिस, हंगेरी, आइसल्याण्ड, इटली, लाटभिया, लिचेतेनिस्तान, लिथुआनिया, लक्जेम्बर्ग, माल्टा, नेदरल्याण्डस, नर्वे, पोल्याण्ड, पोर्चुगल, स्लोभाकिया, स्लोभेनिया, स्पेन, स्वीडेन र स्वीट्जरल्याण्डको भ्रमण गरेका विदेशी नागरिकलाई पनि अमेरिकामा प्रतिबन्ध लगाइएको हो ।
गत जनवरी र फरबरीमा अमेरिकाले चीन र इरानका सन्दर्भमा पनि यस्तै प्रतिबन्धको घोषणा गरेको थियो, जुन अहिलेसम्म कायम रहेको छ ।
कसकसलाई दिइयो छुट ?
अमेरिकी सरकारले युरोपको २६ देशबाट अमेरिका आउनमा प्रतिबन्ध लगाएको छ । तर केही व्यक्तिलाई भने यो प्रतिबन्धबाट छुट दिइएको छ । अर्थात् उनीहरुलाई विगत १४ दिनभित्र ती देशको भ्रमण गरेको भएपनि अमेरिका आउन दिइनेछ । अमेरिकी नागरिकलाई यस्तो प्रतिबन्ध लाग्नेछैन । अमेरिकी नागरिकबाहेक यस्तो छुट पाउनेहरुमा पहिलो नम्बरमा अमेरिकाका ग्रिनकार्डवाहकहरु रहेका छन् ।
त्यस्तै अमेरिकी नागरिक वा ग्रिनकार्डवाहकका दम्पत्तिलाई पनि यस्तो प्रतिबन्ध लाग्नेछैन । २१ बर्ष मुनीका अविवाहित ग्रिनकार्डवाहक र नागरिकका अभिभावक वा बाबुआमामाथि पनि यस्तो प्रतिबन्ध लाग्नेछैन ।
त्यस्तै २१ बर्ष मुनीका अविवाहित ग्रिनकार्डवाहक र नागरिकका दाजुभाईदिदीबहिनीमाथि पनि यो प्रतिबन्ध लाग्नेछैन । अमेरिकी नागरिक वा ग्रिनकार्डवाहकका बच्चा, पालनपोषण गरेका बच्चा, धर्मसन्तानका रुपमा अमेरिका आउन लागेकाहरुमाथि पनि यस्तो प्रतिबन्ध लाग्नेछैन ।
त्यस्तै कोरोना भाइरसको संक्रमण कम गर्न अमेरिकी सरकारको निमन्त्रणामा आउन लागेकाहरुमाथि पनि यो प्रतिबन्ध लाग्नेछैन । विमान वा पानीजहाजका क्रु मेम्बरका रुपमा अमेरिका आउनेहरुलाई पनि यो प्रतिबन्ध नलाग्ने भएको छ ।
विदेशका सरकारी अधिकारीहरु र उनीहरुका परिवारका सदस्यहरुमाथि पनि यो प्रतिबन्ध लाग्नेछैन । त्यस्तै नाटो क्याटेगोरीमा भिसा पाउनेहरुलाई र संयुक्त राष्ट्रसंघको मुख्यालय सममति अनुरुप भिसा पाउनेहरुलाई पनि यो प्रतिबन्ध लाग्नेछैन ।
अमेरिकी स्वास्थ्यमन्त्रीले कुनै व्यक्तिले अमेरिकामा भाइरस नफैलाउने कुरा सीडीसी निर्देशकमार्फत ठहर गरेमा त्यस्तो व्यक्तिमाथि पनि प्रतिबन्ध लगाइनेछैन । अमेरिकी सरकारले कानुन कार्यान्वयनका लागि महत्वपूर्ण ठानेका व्यक्तिलाई पनि प्रवेशमा रोक लगाइनेछैन ।
अमेरिकाको राष्ट्रिय हितमा ठहर गरिएकाहरुलाई पनि प्रतिबन्ध लगाइनेछैन । साथै अमेरिकी सेना र उनीहरुका दम्पत्ति तथा छोराछोरीहरुलाई पनि प्रतिबन्ध लाग्नेछैन ।
अमेरिकी सरकारको यो घोषणाले एसाइलमका योग्यतामा कुनै असर नपर्ने जनाइएको छ । साथै अमेरिकाबाट देशनिकाला हुनबाट बच्ने राहतका लागि पनि यो घोषणाले कुनै असर गर्नेछैन ।