प्रधानमन्त्रीको आज संसदमा गर्ने भनिएको सम्वोधन यसकारण स्थगित
प्रकाशित मिति : फाल्गुन २, २०७६ शुक्रबार
प्रधानमन्त्री केपी शर्मा ओलीले आज संसदमा गर्ने भनिएको संबोधन भोलिसम्मका लागि सरेको छ । राष्ट्रियसभाका सदस्यको निधन भएको कारण प्रधानमन्त्री ओलीले आज गर्न लाग्नुभएको संबोधन भोलिसम्मका लागि स्थगित गरिएको प्रधानमन्त्रीका प्रेस सल्लाहकार सर्य थापाले जानकारी दिनुभयो ।
‘सम्माननीय प्रधानमन्त्री केपी शर्मा ओलीले आज २ बजे प्रतिनिधिसभामा संबोधन गर्न निर्धारित कार्यक्रम संघीय संसदका बहालवाला माननीय सदस्यको असामयिक निधनका कारण स्थगित भएको छ । सम्बोधन भोलि ३ गते बिहान ११ बजे हुनेछ,’ प्रेस सल्लाहकार थापाले भन्नुभयो ।
आज राष्ट्रियसभाका सदस्य दुर्गाप्रसाद उपाध्यायको निधन भएको थियो । उपाध्याय २०७४ मा नेपाली कांग्रेसका तर्फबाट राष्ट्रिय सभामा निर्वाचित भएका थिए ।
रुपन्देहीबाट प्रतिनिधित्व गर्ने सांसद उपाध्यायको शुक्रबार बिहान निधन भएको हो । उपाध्याय केही समयदेखि क्यान्सर रोगबाट पीडित थिए।
उपाध्यायको चितवनस्थित भरतपुर क्यान्सर अस्पतालमा उपचारपछि घर फर्काइएको थियो । २०२६ सालमा जन्मिएका उपाध्याय २०४६ सालको जनआन्दोलनकका बेलादेखि नेपाली कांग्रेसमा आवद्ध भएर राजनीति शुरु गरेका थिए ।
२०५४ सालमा साविकको मधुवनी गाविसको उपाध्यक्षमा निर्वाचित उनी २ पटक कांग्रेस रुपन्देही क्षेत्र नंं ५ को क्षेत्रीय सभापति र त्यसयता महाधिवेशन प्रतिनिधि थिए ।
उपाध्यायका एक श्रीमती, तीन छोरा र दुई छोरी छन् ।
