सिन्धुपाल्चोकको जुगलमा एकसयभन्दा बढीमा कोरोना संक्रमणको आशंका
प्रकाशित मिति : माघ २८, २०७६ मंगलबार
सिन्धुपाल्चोकको जुगल गाउँपालिका वडा ३ गुम्बामा कोरोना भाइरसको लक्षणसँग मिल्ने रुघा, खोकी र अत्याधिक ज्वरोको बिरामी भेटिएका छन् । कोरोना भाईरससंग मिल्ने लक्षण देखिएको भन्दै गाउँपालिकाले सहयोगका लागि प्रदेश स्वास्थ्य मन्त्रालयमा पत्राचार गरेको छ ।
सो क्षेत्रमा रुघा, खोकी र ज्वरोको बिरामीको संख्या आहिले सम्म एक सय भन्दा माथि पुगिसकेको छ । स्वास्थ्य मन्त्रालयका सह प्रवक्ता सागर दाहालले गएराती अबेर गरी पत्र प्राप्त भएकाले आगामि रणनिति बारे आज छलफल गरिने बताउनुभयो । यद्यपी, जिल्लास्थित स्वास्थ्य संस्थाबाट स्वास्थ्यकर्मी जुगल गाउँपालिकामा खटाईसकिएको दाहालको भनाई छ ।
विरामीको चीन यात्रा, त्यहाँको कुनै वस्तुसँग नजिक रहे नहेको अध्ययन गरी टोलीले परिक्षणका लागी काठमाडौं रिफर गर्ने तयारी गरेको छ । रुघा खोकी, अत्याधिक ज्वरो कोरोना भाइरसजस्तै अन्य इन्फ्लुन्जाको केही लक्षणमा समानता हुनाले त्रसित भने हुनु नपर्ने स्वास्थ्य मन्त्रालयले जनाएको छ ।
कोरोना भाइरस संक्रमणको औपचारिक नाम, अब कोभिड १९
४२ हजारभन्दा धेरैमा संक्रमण भएको कोरोना भाइरसको संक्रमणलाई अब औपचारिक नाम दिइएको छ । विश्व स्वास्थ्य संगठनले यो भाइरसको संक्रमणको अवस्थालाई अब कोभिड १९ नाम दिएको छ ।
यसको अर्थ सन् २०१९ मा पत्ता लागेको कोरोना भाइरस रोग भन्ने हुन्छ । अर्थात् यो कोरोना भाइरस डिजिज २०१९ को छोटो रुप हो ।
कुनै समुह, देश, जनावर वा भूभागको उल्लेख हुनेगरी नाम नराख्नेमा आफूहरु सचेत रहेको विश्व स्वास्थ्य संगठनले जनाएको छ ।
अहिलेसम्म ४३ हजार १ सय १ जना कोभिड १९ देखिएको छ । सोमबारमात्र कोभिड १९ बाट चीनमा १ सय ८ जनाको ज्यान गएको छ । चीनमामात्र मृत्यु हुनेको संख्या १ हजार नाघिसकेको छ ।
कोभिड १९ का लागि अबको १८ महिनामा भ्याक्सिन तयार हुनसक्ने विश्व स्वास्थ्य संगठनले जनाएको छ । अहिलेसम्म यसको कुनै उपचार पत्ता लागेको छैन तर चिकित्सिकहरुले पहिले रहेका औषधीहरु मिसाएर बिरामीको उपचार गरिरहेका छन् ।