अमेरिकामा काममा लगाउनुअगाडि बैध स्टाटस भए नभएको प्रमाणित गर्न अबदेखि अपडेटेड फर्म
प्रकाशित मिति : माघ २०, २०७६ सोमबार
आगामी मे १ देखि अमेरिकामा काममा लगाउनुअगाडि बैध स्टाटस भए नभएको प्रमाणित गर्न अपडेटेड फर्म प्रयोग गरिने भएको छ । काम गर्नका लागि योग्य भएको प्रमाणित गर्ने फर्म आई ९ प्रयोजनका लागि सार्वजनिक गरिसकिएको भएतापनि मे १ देखि भने अनिवार्य गरिएको छ ।
अप्रिल ३० सम्म भने रोजगारदाताले आई ९ फर्मको पुरानै संस्करण प्रयोग गर्न सक्नेछन् । नयाँ फर्ममा रोजगारदाताका तर्फबाट कसले आधिकारिक प्रतिनिधिकारुपमा काम गर्न सक्छ भन्ने विषय स्पष्ट पारिएको छ भने अन्य केही परिवर्तनहरु पनि गरिएको छ ।
त्यस्तै युएससीआईएसका वेवसाइट ठेगानाहरु पनि अपडेट गरिएको छ भने कागजी फर्म आई ९ अनुरोध गर्नका लागि नयाँ प्रकृयाहरुबारे पनि उल्लेख गरिएको छ । त्यस्तै डिपार्टमेन्ट अफ होमल्याण्ड सेक्युरिटीको गोपनियता नीति पनि अपडेट गरिएको छ ।
अमेरिकामा रोजगार दिइएको व्यक्तिको पहिचान र रोजगार प्रमाणित गर्न यो फर्मको प्रयोग गरिन्छ । अमेरिकामा काममा लगाइएको हरेक व्यक्तिका लागि सबै रोजगारदाताले फर्म आई ९ राम्रोसँग भर्न जरुरी हुन्छ ।
अमेरिकी नागरिक होस् वा गैर नागरिक, जसलाई रोजगारमा लगाउँदा पनि यो फर्म भर्न अनिवार्य गरिएको छ । रोजगारदाता र कामदार दुबैले फर्म भर्न आवश्यक छ ।
फर्ममा कामदारले आफू काम गर्न कानुनी हैसियतले योग्य रहेको प्रमाणित गर्नुपर्छ भने वर्क परमिट लगायतका कागजातहरु समेत पेश गर्नसक्छ । रोजगारदाताले काममा लगाउनुअगाडि कामदार काम गर्न बैध हिसाबले योग्य भए नभएको जाँच गर्न अनिवार्य छ ।
यो फर्म भरेर युएससीआईएस वा अमेरिकी सरकारलाई पठाउने नभई रेकर्डका रुपमा रोजगारदाताले आफूसँग राख्नुपर्छ । यदि अमेरिकी सरकारका निकायबाट अनुरोध भएमा जाँचबुझका लागि ती फर्महरु उपलब्ध गराउनुपर्छ । अन्यथा रोजगारदातामाथि कारवाही हुनसक्छ ।