चीनबाट आउने र १४ दिनभित्र चीन गएकाहरुलाई अमेरिकामा यात्रा प्रतिबन्ध, विमानस्थलबाट फर्काइने
प्रकाशित मिति : माघ १९, २०७६ आईतबार
कोरोना भाइरसबाट ३ सय भन्दा धेरैको ज्यान गएपछि अमेरिकाबाट चीनबाट अमेरिकामा आउने विदेशीहरुमाथि प्रतिबन्ध लगाएको छ । यदि कुनै व्यक्ति चीनबाट विभिन्न भिसामा अमेरिकामा आएको खण्डमा उसलाई अमेरिका प्रवेशमा रोक लगाएर फिर्ता पठाइनेछ ।
आइतबार बेलुका ५ बजेदेखि लागु हुनेगरी यो प्रतिबन्धको घोषणा गरिएको हो । अमेरिकी नागरिक, ग्रिनकार्डवाहक र उनीहरुका नजिकका नातेदारका हकमा भने यो लागु हुनेछैन । यदि चीनबाट आउने विमानमा अमेरिकी नागरिक, ग्रिनकार्डवाहक र उनीहरुका नजिकका नातेदार रहेको खण्डमा उनीहरुलाई अमेरिकामा विभिन्न ७ वटा विमानस्थलमा अवतरण गराइनेछ ।
यदि चीनबाट सिधा उडानमा नआई अन्य देशहुँदै आएको तर विगत १४ दिनभित्र चीनमा गएको व्यक्तिमाथि पनि यस्तो प्रतिबन्ध लाग्नेछ ।
चीनबाट आउने अमेरिकी नागरिक , ग्रिनकार्डवाहक र उनीहरुका नजिकका नातेदारलाई न्युयोर्कको जोन अफ केनेडी, शिकागोको ओहेर इन्टरनेशनल एयरपोर्ट, सान फ्रान्सिस्को इन्टरनेशनल एयरपोर्ट, शियाटल टकोमा इन्टरनेशनल एयरपोर्ट, हवाइको डानियल के इन्टरनेशनल एयरपोर्ट, लस एन्जलस इन्टरनेशनल एयरपोर्ट र जर्जियाको हार्टसफिल्ड ज्याक्सन एटलान्टा इन्टरनेशनल एयरपोर्टमा पठाइनेछ । यसरी ती विमानस्थलहरुमा पठाइदा यात्रुले छुट्टै रकम भने तिर्नु नपर्ने जनाइएको छ ।
यदि विगत १४ दिनमा चीनमा यात्रा गरेकाहरुलाई ती सात विमानस्थलमा अवतरण गराइने र विशेष स्वास्थ्य जाँच गरिने भएको छ । चीनको हुवेई वा अन्य प्रान्तको यात्रा गरेका र लक्षण देखिएकाहरुलाई अनिवार्य स्वास्थ्यजाँच गरिनेछ ।
चीनमा गएको तर कुनै हुवेईभन्दा बाहिर समय विताएको यात्रुका सन्दर्भमा लक्षण नदेखिएपनि ती सातवटा विमानस्थलमा अवतरण गराइनेछ । जेकजाँचपछि उनीहरुको गन्तब्यको टिकट बुक गरेर पठाइनेछ । तर उनीहरुले घरमा आफै स्वजाँच गर्नुपर्नेछ ।
अष्ट्रेलियाले यस्तै खालको प्रतिबन्ध लगाएलगत्तै अमेरिकाले पनि प्रतिबन्ध लगाएको हो । कोरोना भाइरसको संक्रमण अहिलेसम्म १४ सयभन्दा धेरैमा पुष्टी भइसकेको छ । अमेरिकामा मात्र नौजनामा कोरोनाको संक्रमण पुष्टी भइसकेको छ ।
यसैबीच कैयन एयरलाइन्सहरुले अमेरिका र चीनबीचका उडानहरु रद्द गरिसकेका छन् । डेल्टा एयरलाइन्सले आइतबारदेखि लागु हुनेगरी अप्रिल ३० सम्म चीनसँगका सबै उडानहरु रद्द गरेको छ । अमेरिकन एयरलाइन्सले पनि चीनसँगका सबै उडान रद्द गरेको छ । युनाइटेड एयरलाइन्सले पनि कैयन उडानहरु रद्द गरेको छ ।