यी देशको यात्रा गर्दा अमेरिकन पासपोर्ट हुनेलाई पनि चाहिन्छ भिसा
अमेरिकी पासपोर्टवाहकले विश्वका १८४ देश विनाभिसा पनि यात्रा गर्न सक्छन् । ती देशहरुमा जानका लागि या त भिसाकै आवश्यकता पर्दैन, या ईभिसा लिन सकिन्छ या विमानस्थलमा नै भिसा दिने व्यवस्था गरिएको हुन्छ । तर केही यस्ता देशहरु पनि छन् जुन देशको भ्रमण गर्न अमेरिकी पासपोर्टवाहकले भिसा लिन जरुरी हुन्छ ।
अफगानिस्तान, अल्जेरिया र भुटान जानका लागि अमेरिकी पासपोर्टवाहकलाई भिसा लिन जरुरी हुन्छ । अझ भुटान जानका लागि त हरेक दिन कम्तीमा २५० डलर शुल्क समेत बुझाउनुपर्छ ।
त्यस्तै बुरुन्डी, क्यामरुन, चाड जानका लागि अमेरिकन पासपोर्टवाहकलाई भिसाको आवश्यकता पर्छ । त्यस्तै चीन जानका लागि पनि भिसाको आवश्यकता पर्छ तर चीनका कैयन विमानस्थलमा अमेरिकी पासपोर्ट हुनेहरुलाई ७२ देखि १४४ घण्टासम्मको ट्रान्जिट भिसाको समेत व्यवस्था गरिएको छ ।
त्यस्तै कँगो जानका लागि भिसा आवश्यक छ भने क्युबा जानका लागि पर्यटक कार्ड नै बनाउनुपर्छ । क्युबामाथि अमेरिकाले प्रतिबन्धहरु लगाएका कारण क्युबा जानु अगाडि राम्रोसँग बुझेरमात्र जान आवश्यक छ ।
इरिटेरिया, गाम्बिया, घाना, इरान, इराक जानका लागि पनि अमेरिकन पासपोर्टवाहकलाई भिसा आवश्यक छ । उत्तर कोरियाको भ्रमण गर्न भने अमेरिकी नागरिकलाई यात्रा प्रतिबन्ध लगाइएको छ ।
लाइबेरिया जानका लागि भिसा लिनु आवश्यक छ भने लिबिया जानका लागि भिसा लिनुका साथै विमानस्थलमा कम्तीमा १ सय अमेरिकी डलर साटेको हुनुपर्छ । यदि तपाई विगतमा इजरायल जानुभएको छ भने वा तपाईसँग इजरायलको भिसा छ भने तपाईलाई लिविया प्रवेश गर्न दिइदैन ।
माली, नाउरु, नाइजर, नाइजेरिया, रसिया र सुडान जानका लागि पनि अमेरिकी पासपोर्ट वाहकले भिसा लिनु आवश्यक छ । सिरिया, तुर्कमिनिस्तान, भेनेजुएला, यमन जानका लागि पनि भिसा लिन आवश्यक छ ।
