अमेरिकाबाट थप ६ देशमाथि भिसा प्रतिबन्धको घोषणा, डिभी परेकालाई पनि भिसा नदिइने
प्रकाशित मिति : माघ १७, २०७६ शुक्रबार
अमेरिकाकाले आज म्यानमारसहित थप ६ देशमाथि भिसा प्रतिबन्धको घोषणा गरेको छ । आज अमेरिकी राष्ट्रपति डोनाल्ड ट्रम्पले म्यानमार, इरिटेरिया, क्रिग्रिस्तान, नाइजेरिया, सुडान र तान्जिनियामाथि भिसा प्रतिबन्ध लगाउने घोषणामा हस्ताक्षर गरेका छन् ।
नयाँ प्रतिबन्ध अनुरुप बर्माका आप्रवासीहरुलाई अमेरिकामा आउन भिसा प्रतिबन्ध लगाइएको छ । तर अमेरिकी सरकारलाई सहयोग प्रदान गर्ने आधारमा विशेष आप्रवासीका लागि योग्य हुनेले भने भिसा प्राप्त गर्नसक्नेछन् । इरिटेरिया, क्रिग्रिस्तान र नाइजेरियामाथि पनि यस्तै खालको भिसा प्रतिबन्ध लगाइएको छ ।
अमेरिकी राष्ट्रपति डोनाल्ड ट्रम्पले गरेको घोषणाको पूर्ण पाठ यहाँ उपलब्ध छ ।
सुडान र तान्जिनियाका नागरिकका सन्दर्भमा पनि डिभी लोटरी परेकाहरुलाई अमेरिकी भिसामा प्रतिबन्ध लगाइएको छ । सुडानबाट अमेरिकामा आतंककारीहरु आउनसक्ने सम्भावना भएको भन्दै डिभी लोटरी विजेताहरुमाथि प्रतिबन्ध लगाइएको हो । तान्जिनियाका सन्दर्भमा भने सुचना शेयर गर्ने प्रावधान पूरा नगरेको भन्दै डिभी लोटरी विजेताहरुको भिसामा प्रतिबन्ध लगाइएको हो ।
भिसा प्रतिबन्धबारे प्रेस सेक्रेटरीको वक्तब्य
भिसा प्रतिबन्ध घोषणा गरिएका नयाँ मुलुकहरुमा बर्मा बाहेक सबैमा ३५ प्रतिशत वा त्यो भन्दा बढी मुस्लिम जनसंख्या रहेको छ । यसअगाडि राष्ट्रपति डोनाल्ड ट्रम्पले घोषणा गरेको यात्रा प्रतिबन्धमा पनि मुस्लिम बाहुल्य देशहरु रहेका थिए ।
भिसा प्रतिबन्धबारे होमल्याण्ड सेक्युरिटीको वक्तब्य
यसअगाडि अमेरिकामा भिसा प्रतिबन्ध लगाइएकाहरु
यस अगाडि देखि नै इरान, लिबिया, नर्थ कोरिया, सिरिया र यमनका नागरिकहरुलाई सामान्यतया अमेरिका आउनमा रोक लगाइएको छ । उनीहरुलाई भिजिटर लगायतका गैर आप्रवासी भिसा वा अमेरिकामा विभिन्न श्रेणीको ग्रिनकार्ड फाइल गरेर आप्रवासी भिसामा आउनसमेत प्रतिबन्ध लगाइएको छ ।
इरान, लिबिया र यमनका विद्यार्थीहरुका सन्दर्भमा भने केही अपवाद लागु गरिएको छ । उनीहरु विद्यार्थी भिसामा अमेरिका आउनसक्ने बाटो त खोलिएको छ तर त्यो बाटो निकै साँगुरो छ ।
सुरुमा चाडलाई पनि भिसा प्रतिबन्ध लगाइएको थियो । तर पछि उक्त सुचीबाट भने चाडलाई हटाइयो । सोमालियाका नागरिकलाई पनि अमेरिकामा आप्रवासी भिसामा प्रतिबन्ध लगाइएको छ । तर अमेरिका भ्रमण गर्न आउनका लागि भिजिटर लगायतका गैर आप्रवासी भिसामा भने प्रतिबन्ध लगाइएको छैन ।
भेनेजुएलाका केही सुरक्षा अधिकारीहरुमाथि पनि भिसा प्रतिबन्ध लगाइएको छ ।
यात्रा प्रतिबन्ध सुरु भएपछि ४२ हजार भिसाका आवेदनहरुलाई अयोग्य सावित गरिसकिएको छ । तर कतिपय भिसाका आवेदनमा भने वेभर समेत जारी गरिएको छ ।