विमानस्थलमा ८ घण्टा केरकार, अमेरिका छिर्न नदिएरै जहाजमा राखेर फिर्ता
प्रकाशित मिति : माघ १५, २०७६ बुधबार
बोस्टनमा अध्ययनका लागि रिहाना इमामी इरानको तेहरानबाट जहाज चढेर बोस्टन आइपुगिन् ।
उनले अमेरिका आउनका लागि यो भिसा पनि निकै मुस्किलले पाएकी थिइन् । अमेरिकी सरकारले झण्डै १ सय दिन उनको पृष्ठभूमि परीक्षण र चेकजाँचपछि उनलाई यो भिसा उपलब्ध गराएको थियो ।
३५ बर्षकी उनी हार्भर्ड डिभाइनिटी स्कुलमा ग्रयाजुएटका लागि आएकी उनी जब लोगान इन्टरनेशनल एयरपोर्टमा आइपुगिन्, उनलाई सीबीपीका अधिकारीहरुले सोधपुछका लागि भन्दै छुट्टै लगे ।
उनलाई विमानस्थलको अलग्गै कोठामा लगियो । उनको यात्रा, कामको अनुभव परिवारको बारेमा मात्र नभई इरानमा रहँदा प्रयोग गर्ने फोननम्बरका बारेमा समेत सोधपुछ भयो । उनको लगेज खोतलेर कुरान निकालियो । अधिकारीले कुरानबारे पनि प्रश्न सोधे ।
उनलाई साउदी अरेबियामा भएको विष्फोटबारे इरानीहरु के सोंच्छन् भनेर समेत सोधियो । साउदी अरेबियाको तेल कम्पनीमा इरान समर्थित एउटा समुहले ड्रोन आक्रमण गरेको थियो ।
उनको ल्यापटप र फोनपनि खानतलासी लिइयो । यदि गरेपछि पनि उनलाई अमेरिका छिर्न दिइएन । झण्डै ८ घण्टापछि उनलाई पाँचबर्षको प्रतिबन्ध लगाउँदै इरान नै फिर्ता पठाइयो । सीबीपीले उनी अमेरिकामा पढ्नमात्र नभई बस्न समेत आएको निष्कर्ष निकालेको थियो ।
त्यस्तै तेहरानको विश्वविद्यालयका एकजना तेजिला विद्यार्थी अमिन फ्लोरिडा युनिभर्सिटीबाट पीएचडी गर्नका लाथि जर्जिया आए । उनलाई एटलान्टाको विमानस्थलमा केरकार गरियो । पछि उनलाई जब सीबीपी अधिकारीले जुन जहाजमा आएको हो, त्यसैमा फर्किनुपर्ने बताए, उनी आत्तिएर काप्न र रुन थाले ।
इरान फर्कने जहाज तीनदिनका लागि उपलब्ध थिएन तर सीबीपी अधिकारीहरुले उनलाई २४ घण्टाभन्दा धेरै एयरपोर्टमा राख्न नसक्ने बताए । एयरपोर्टको कोठामा ६ घण्टा राखेपछि उनलाई हतकडी लगाएर जर्जियाको डिटेन्सन सेन्टरमा लगेर राखियो ।
त्यस्तै अमेरिकामा पीएचडी गर्नका लागि लस एन्जलसको विमानस्थलमा आएका मोहम्मद एल्मीलाई छुट्टै कोठामा लगेर जाँचबुझ र पुछताछ गरियो । पछि उनलाई पनि अमेरिका छिर्न ५ बर्षको प्रतिबन्ध लगाउँदै इरान फिर्ता पठाइयो । एल्मीले आफूलाई आतंककारीलाई जस्तो व्यवहार गरिएको बताए ।
अगस्त यता कम्तीमा पनि १५ जना इरानी विद्यार्थीहरुलाई अमेरिकी विमानस्थलबाट फिर्ता पठाइएको छ । त्यो बाहेक थप २० जनालाई इरानबाटै जहाज चढ्न दिइएन । कैयनले त आफूलाई अमेरिका प्रवेशमा रोक लगाइएको कारण समेत नदिइएको बताएका छन् ।
जनवरीको सुरुतिर अमेरिका र क्यानडाको सिमानामा ६० जना इरानी र इरानी अमेरिकनलाई समेत घण्टौं सोधपुछ गरिएका समाचार आएका थिए ।