अमेरिकी भूमिमा आउने यात्रुको विमानस्थलमा गर्भजाँच गर्ने एयरलाइन्सले माग्यो माफी


प्रकाशित मिति : माघ २, २०७६ बिहीबार

अमेरिकी भूमिमा आउन लागेकी जापानी यात्रुको विमानमा चढाउनुअगाडि गर्भजाँच गर्ने एयरलाइन्सले माफी मागेको छ । बच्चाको अमेरिकी नागरिकताका लागि अमेरिकी भूमिमा बच्चा जन्माउन आउन लागेको आशंकामा विमान चढ्नु अगाडि विमानस्थलमा गर्भवती भए नभएको जाँच गरिएको थियो । हङकङबाट अमेरिकी आइल्याण्ड साइपन आउँदैगरेकी २५ बर्षकी जापानी युवतीको विमानस्थलमा गर्भजाँच गरिएको थियो ।

हङकङ एक्सप्रेस एवरवेजले यो घटनाप्रति माफी माग्दै यसबाट प्रभावित हुनेहरुप्रति माफी मागेको छ । विमानस्थलमा गर्भजाँच गर्ने प्रकृयाको तत्काल पुनरावलोकन गरेर उक्त अभ्यास र प्रकृया खारेज गरिसकिएको एयरलाइन्सले स्पष्ट पारेको छ ।

अमेरिकी आइल्याण्ड साइपनमा जन्मिने बच्चा अमेरिकी नागरिक हुन पाउने प्रावधान भएका कारण ती जापानी युवती पनि बच्चा जन्माउन आउन लागेको हुनसक्ने आशंका गर्दै गर्भजाँच गरिएको थियो । उनी आफ्ना बाबुआमालाई भेट्न साइपन आउन लागेकी थिइन् ।

मिदोरी निसिदा नामकी युवतीलाई सुरुमा केही प्रश्नावलीहरु दिएर जवाफ दिन भनिएको थियो, जसमा गर्भवती भए नभएकोबारेको पनि प्रश्न रहेको थियो । पछि हङकङ एक्सप्रेस एवरवेजका कर्मचारीले उनलाई रयाण्डम फिट टु फ्लाईका लागि परीक्षण गर्न छानिएको बताएका थिए ।

त्यसपछि उनलाई ट्वाइलेटमा लगेर गर्भवती भए नभएको जाँच गर्ने एउटा फित्तमा पिसाव फेर्न लगाइएको थियो । साइपनले पर्यटकहरु आएर अमेरिकी नागरिकताका लागि बच्चा जन्माउने विषयमा कडाई गरेका कारण साइपनको चासोलाई सम्बोधन गर्न एयरलाइन्सले यसो गरेको थियो ।

सन् २०१८ मा नर्दन मेरियाना आइल्याण्डमा त्यहाँका बासिन्दालेभन्दा धेरै विदेशी पर्यटकहरुले बच्चा जन्माएका थिए । साइपन उक्त आइल्याण्डको सबैभन्दा ठूलो आइल्याण्ड हो । यो आइल्याण्ड पछिल्लो बर्षमा कैयन पर्यटकका लागि बच्चा जन्माउने गन्तब्य बनेको छ ।

गर्भवती पर्यटकहरुलाई अमेरिका र अमेरिकी भूभागमा यात्रा गर्नका लागि प्रतिबन्ध लगाइएको छैन । तर अधिकारीहरुले यदि यात्रा गर्नुको उद्देश्यबारे झुठो बोलेको पाएमा त्यस्ता व्यक्तिलाई विमानस्थलबाटै फर्काउन समेत सक्ने प्रावधान छ ।

त्यस्तै बच्चा जन्माउने लगायतका मेडिकल प्रकृयाका लागि तिर्न प्रयाप्त रकम भएको प्रमाणित गर्न नसक्नेहरुलाई समेत विमानस्थलबाट फर्काउन सक्छन् ।

जापानी युवतीले यस्तो परीक्षण अनिवार्य छ भनेर प्रश्न समेत गरेकी थिइन् । जवाफमा एयरलाइन्सका कर्मचारीहरुले यस्तो परीक्षण अनिवार्य नभएको तर परीक्षण नगरे विमानमा चढ्न नदिइने बताएका थिए । त्यसपछि उनले बाध्य भएर परीक्षणका लागि अनुमति दिएकी थिइन् ।

परीक्षणका क्रममा गर्भवती नभएको पाइएपछि उनलाई विमान चढ्न दिइएको थियो । हालै क्याथे प्यासेफिकले किनेको बजेट एयरलाइन्स हङकङ एक्सप्रेस एवरवेजले अमेरिकी अध्यागमन कानुनको उल्लंघन नभएको सुनिश्चित गर्ने मापदण्डहरुलाई सन् २०१९ को फरबरीदेखि स्वीकार गर्दै आएको थियो ।

सन् २००९ यता साइपन समेत रहेको नर्दन मेरियाना आइल्याण्डमा चिनिया पर्यटकहरुलेमात्र ३०२३ बच्चा जन्माएका छन् । गतबर्ष पर्यटकहरुले त्यहाँ ५८२ बच्चा जन्माएका थिए, जब कि गतबर्ष त्यहीका बासिन्दाले जम्मा ४९२ बच्चा जन्माएका थिए ।

यद्यपी अमेरिकी सरकारले कुनै पनि एयरलाइन्सलाई गर्भवती भए नभएको जाँचेरमात्र विमान चढाउन नभनेको जनाइएको छ । यद्यपी त्यहाँका गभर्नर लगायतका स्थानीय अधिकारीहरुले अमेरिकी ट्रम्प प्रशासन, संघीय निकायहरु र होमल्याण्ड सेक्युरिटी समक्ष पर्यटकहरु आएर बच्चा जन्माउने समस्याका बारेमा कुरा उठाउँदै आएका छन् ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com