अमेरिकाले विमान चार्टड गरेर देशनिकाला गरेका ५ नेपाली काठमाडौंमा
प्रकाशित मिति : पुस ३, २०७६ बिहीबार
अमेरिकाले देशनिकाला गरेर पठाएका नेपालीहरु काठमाडौंको विमानस्थलमा
अमेरिकी सरकारले देशनिकालामा परेका पाँच नेपालीलाई विमान चार्टर्ड गरेर काठमाडौं ल्याएर छाडेको छ । उनीहरुलाई बुधबार काठमाडौं छाडिएको जनाइएकोछ ।
अमेरिकी सरकारले सन् २०१९ को जनवरीयतामात्र ११५ जना नेपालीहरुलाई देशनिकाला गरेर यसरी नेपाल पठाएको छ । तर आर्थिक बर्ष २०१९ को कुल संख्या भने १६२ रहेको छ ।
अमेरिकी सरकारको इमिग्रेशन एण्ड कस्टम इन्फोर्समेन्ट आइसले सार्वजनिक गरेको नयाँ रिपोर्ट अनुशार आइसको देशनिकालामा पर्ने नेपालीहरुको संख्या गतबर्षको तुलनामा झण्डै ४ गुणा बढेको छ । आर्थिक बर्ष २०१९ मा आइसमार्फत देशनिकालामा पर्ने नेपालीहरुको संख्यामा नाटकीय रुपमा बृद्धि भएको हो ।
रिपोर्टको पूर्ण पाठ पढ्न चाहनुहुन्छ भने यहाँ क्लिक गर्नुहोला ।
आर्थिक बर्ष २०१९ मा आइसमार्फत देशनिकालामा पर्ने नेपालीहरुको संख्या १६२ रहेको छ । उनीहरुमध्ये अधिकांश दलाललाई लाखौं रकम बुझाएर मेक्सिकोको बाटोहुँदै अमेरिका छिर्न खोज्दा पक्राउ पर्नेहरु हुन् । आर्थिक बर्ष २०१८ मा यसरी आइसमार्फत देशनिकालामा पर्ने नेपालीहरुको संख्या जम्मा ४५ रहेको थियो ।
आइसमार्फत देशनिकालामा पर्ने बंगालादेशीहरुको संख्यामा भने खासै बृद्धि भएको छैन । सन् २०१८ मा १४७ जना बंगालादेशीहरु आइसमार्फत देशनिकालामा परेकोमा सन् २०१९ मा १५९ जना बंगादेशीहरु आइसमार्फत देशनिकालामा परेका छन् ।
तर भारतीयहरुको संख्या भने नाटकीय तरिकाले बढेको छ । सन् २०१८ मा जम्मा ६११ ज्ना भारतीयहरु आइसमार्फत अमेरिकाबाट देशनिकालामा परेका थिए तर सन् २०१९ मा यो संख्या १६ सय १६ पुगेको छ । कैयन भारतीयहरुलाई विमानै चार्टड गरेर भारतमा लगेर छाडिएको छ ।
आर्थिक बर्ष २०१९ मा आइसमार्फत देशनिकालामा पर्नेहरुको कुल संख्या भने २ लाख ६७ हजार २ सय ५८ रहेको छ । गतबर्ष यो संख्या २ लाख ५६ हजार ८५ रहेको थियो । २०१९ मा आइसमार्फत देशनिकालामा पर्नेमा सबैभन्दा धेरै मेक्सिकोका १ लाख २७ हजार ४ सय ९२, ग्वाटेमालाका ५४ हजार ९१९ र होण्डुरसका ४१ हजार ८ सय रहेका छन् । गतबर्षको तुलनामा ग्वाटेमाला र होण्डुरसका नागरिकको संख्या बढेपनि मेक्सिकनको भने घटेको छ ।
विगतका बर्षमा आइसमाफर्त कति नेपाली डिपोर्ट ?
विगतका बर्षहरुमा आइसमार्फत देशनिकालामा पर्ने नेपालीहरुको संख्या निकै कम रहेको छ । सन् २०१७ मा जम्मा ४५ जना नेपालीहरु आइसमार्फत देशनिकालामा परेका थिए भने सन् २०१६ मा यो संख्या जम्मा २५ रहेको थियो ।