‘भिसाका लागि कागजपत्र नक्कली बनाउनसक्ने भएकाले अन्तरवार्तामात्र’ – अमेरिकी दूतावास, काठमाडौं
प्रकाशित मिति : मंसिर २७, २०७६ शुक्रबार
अमेरिकी दूतावास काठमाडौंले अमेरिकाको गैरआप्रवासी भिसाका लागि आवेदकले कागजपत्र नक्कली बनाउनसक्ने भएकाले आफूहरुले सबै सुचना अन्तरवार्तामार्फत नै लिने प्रणाली बनाएको स्पष्ट पारेको छ । दूतावासको फेसबुक पेजमा कन्सुलर अफिसरले भिसा च्याटका क्रममा दिएको जवाफमा पटकपटक यस्तो बताएका हुन् ।
विद्यार्थी भिसाका डिपेन्डेन्टमा जान चाहनेहरुले भिसाको दुरुपयोग नगर्ने कुरा देखाउन सक्नुपर्ने र उनीहरुले अमेरिकामा काम नगरी बस्न सक्ने आधार देखाउनुपर्ने कन्सुलर अफिसरको भनाई छ । त्यस्तै पढाई सकिएपछि फर्कने आधार हुनुपर्ने र विगतमा भिसा नपाएकाहरुले आफ्नो अवस्था परिवर्तन भएपछि पुन भिसाका लागि आवेदन दिनसक्ने कन्सुलर अफिसरले बताएका छन् ।
त्यस्तै बीवान बी टु भिसामा अमेरिका जानका लागि मेडिकल इन्सुरेन्स नचाहिने भिसा च्याटमा स्पष्ट पारिएको छ । अन्य आप्रवासी भिसा वाहकका लागि समेत मेडिकल इन्सुरेन्सको नियम कार्यान्वयनमा अदातलले रोक लगाएको छ ।
टुरिस्ट भिसाको लागि स्पोन्सर नचाहिने, भिसा पाउन फर्कने कुराको ग्यारेन्टी हुनुपर्ने जस्ता कैयन रेडीमेड जवाफहरु भिसा च्याटमा दिइएको छ । अधिकांशले व्यक्तिगत प्रश्न सोधेकोमा त्यस्ता प्रश्नको जवाफ दिन नसक्ने बताइएको छ भने नेपाली भाषामा सोधिएका प्रश्नको पनि जवाफ दिइएको छैन । अधिकांश प्रश्नहरु र जवाफ पुरानै दोहोरिएका छन् ।