क्यानडाले २० हजार आप्रवासीका बाआमा र हजुरबाआमालाई ल्याउन दिने
प्रकाशित मिति : भाद्र ७, २०७५ बिहीबार
क्यानडाका नागरिक वा स्थायी बासिन्दाहरुले सन् २०१९ मा २० हजार बाआमा र हजुरबाआमालाई स्पोन्सर गर्न पाउने भएका छन् । सन् २०१४ मा यो संख्या ५ हजारमात्र रहेकोमा अहिले चारगुणा बढाएर २० हजार बनाइएको हो ।
क्यानडेयिन सरकारको नयाँ घोषणाले बाआमा वा हजुरबाआमा ल्याउनलाई पर्खिरहेका आप्रवासीहरुमा नयाँ आशा थपेको छ । सन् २०१९ सुरु हुनासाथ आवेदन लिन सुरु गर्ने र २० हजार आवेदन पुरा भएपछि थप आवेदन नलिइने क्यानडाका नागरिकता, शरणार्थी तथा अध्यागमन मन्त्री अहमद हुसैनले जनाएका छन् ।
बाआमा वा हजुरबाहजुरआमालाई स्पोन्सर गर्न चाहने आप्रवासीहरुका लागि सन् २०१९ सुरु हुनासाथ अनलाइनमा इन्ट्रेस्ट टु स्पोन्सर फर्म उपलब्ध हुनेछ । उक्त फर्म भरिसकेपछि सरकारले २० हजार आवेदन नपुग्दासम्म स्पोन्सरसिप आवेदन भर्नका लागि निमन्त्रणा दिनेछ । उक्त निमन्त्रणा पाएकाहरुलेमात्र बाआमा वा हजुरबाआमालाई स्पोन्सर गर्न पाउनेछन् ।
क्यानेडियन सरकारले सन् २०२० सम्म बाआमा र हजुरबाआमालाई स्पोन्सर गर्न पाउने संख्या २१ हजार पुर्याउने अपेक्षा गरिएको छ । सन् २०१६ मा १० हजारको लिमिट तोकिएको थियो भने सन् २०१८ मा १७ हजारको लिमिट तोकिएको थियो । १९ बर्ष नाघेका स्थायी बासिन्दा वा क्यानेडिन नागरिकहरुले आफ्ना बाआमा वा हजुरबाआमालाई स्पोन्सर गर्न पाउने नियम रहेको छ । क्यानेडियन इन्डिएन ऐन अनुशार इन्डियनका रुपमा क्यानडामा दर्ता भएको व्यक्तिले समेत स्पोन्सर गर्न पाउने जनाइएको छ ।
इन्ट्रेस्ट टु स्पोन्सर फर्म भरिसकेपछि सरकारले स्पोन्सरसिप आवेदनका लागि निमन्त्रणा दिएपछि स्पोन्सर गर्दा आफ्नै बाआमा वा हजुरबाआमालाई गर्नुपर्ने नियम रहेको छ । उक्त निमन्त्रणालाई श्रीमान् वा श्रीमतिको बाआमा वा हजुरबाआमालाई स्पोन्सर गर्न को साइनरका रुपमा प्रयोग गर्न पाइनेछैन ।
