दलाललाई लाखौं तिरेर गैरकानुनी सिमापारबाट नेपालीहरु अमेरिका आउने क्रम कमी
गैरकानुनी रुपमा सिमा पार गरेर अमेरिका छिरेर एसाइलम गर्न खोज्नेलाई गैरकानुनी सिमापारको अपराधको अभियोग लगाउन थालिएपछि दलाललाई लाखौं तिरेर गैरकानुनी सिमापारबाट नेपालीहरु अमेरिका आउने क्रम ह्वात्तै घटेको छ । दलाललाई ५० लाख रुपैयासम्म बुझाएर नेपालीहरु मेक्सिकोको बाटोहुँदै अमेरिका आउने क्रम सन् २००९ देखि सन् २०१७ सम्म चरमोत्कर्षमा पुगेको थियो ।
अमेरिका प्रवेश गर्ने आधिकारिक नाका पोर्ट अफ इन्ट्रीमा आएर एसाइलम दावी गर्नेहरुलाई मात्र एसाइलमको पकृयामा लगिने तथा गैरकानुनी रुपमा सिमाबाट छिर्नेलाई अपराधको अभियोग लगाइने भएपछि नेपालीहरु लुकिछिपी सिमाबाट अमेरिका छिर्ने क्रम घटेको हो ।
नेपालमा पहिलेजस्तो माओवादी युद्ध पनि नभएको र खास खतराजन्य अवस्था पनि नरहेका कारण विभिन्न भिसामा अमेरिका आएर नेपालीहरुले एसाइलम अफिसमा एसाइलमका आवेदन दिने क्रममा पनि कमी आएको छ । एकपछि अर्को गर्दै एसाइलमका नियममा आएको परिवर्तन र पछि आवेदन दिनेहरुलाई फटाफट अन्तरवार्ता दिएर केस टुंगो लगाउने ट्रम्प प्रशासनको नीतिका कारण नयाँ आवेदकले एसाइलम पेन्डिङका आधारमा अमेरिकामा वर्क परमिट पाउन पनि असहज बन्दै गएको छ ।
यसबारेको थप रिपोर्ट खसोखासको आगामी अंकमा प्रकाशित हुनेछ । आगामी अंकदेखि खसोखास काठमाडौं, बुटवल र पोखरामा पनि उपलब्ध हुनेछ ।
